कञ्चन मेचेले बच्चा च्यापेर ज्यान जोगाइन् । लाक्पा शेर्पा र डुक्पा विश्वकर्मा ज्यानै बचाउन भागे । अमृत रुम्दाली राईको घर पनि बाढीले सोरेर लग्यो । ३५ घरका करिब करिब डेढ सय जना खुला आकाशमुनि रात बिताउन बाध्य छन् ।  

वडा अध्यक्ष दिलिप प्रधानका अनुसार सबै पीडित अहिले विद्यालय र आफन्तको घरमा आश्रित छन्। त्रिपाल टाँगेर रात काट्दै छन्, खाने व्यवस्थापन वडा कार्यालयले गरेको छ ।

प्रमुख जिल्ला अधिकारी सुनिता नेपालका अनुसार पीडितहरुलाई राहत वितरणका लागि पहल भइरहेको बताए । 

यो विपत्ति पहिलोपटकको हैन । २०२५ सालमा पनि माई खोलाले यस्तै प्रकोप मच्चाएको थियो । अहिले पनि इलामभर ३९ जनाको मृत्यु भएको छ, मेची राजमार्गका धेरै सडक खण्ड भासिएका छन् । 

कोशी प्रदेश सरकारले सेनाको हेलिकोप्टरमार्फत इलाम र माङसेबुङका पीडितलाई राहत—चामल, दाल, आलु, ओछ्यान, नुन–तेल र ब्लाङ्केट—वितरण गरेको छ । मुख्यमन्त्री हिक्मतकुमार कार्की स्वयं राहत बोकेर प्रभावित क्षेत्र पुगेका थिए ।