भैँसी दुहेर दुध संगालिरहेका किसानको जाँगर र उमङ्ग पोखिएको यो ठाउँ किसानका लागि गोठालो बस्ने थलो हो, पशु–चौपायाका लागि पेट पर्ने पाटन हो। अनि हामीजस्तै घुमन्तेहरुका लागि आनन्दको श्वास फेर्ने, अनि उत्साहका पैतला राख्ने भु–स्वर्ग हो । रुकुम पूर्वको पुथाउत्तरगंगा गाउँपालिका वडा नं. ५ मा अवस्थित ठाकुर ढोरपाटन शिकार आरक्ष क्षेत्रभित्र पर्दछ । जेठ महिनामा यहाँ उक्लिएका आफुहरु असोजपछि भने चिसो छल्न र चाडबाडमा रमाउन मुल घरतिरै बसाइँ सर्ने गोठाला सागर सुनारले बताए ।

हिउँदमा हिउँले ढाकिने ठाकुर पाटन समुन्द्री सतहदेखि ३३ सय मिटर उचाईमा अवस्थित छ । रुकुम पूर्वको हुकाम र तकसेरातर्फबाट अनि बागलुङको ढोरपाटनतर्फबाट एक दिनको पैदल यात्रा गरेपछि सजिलै यहाँसम्म आउन सकिन्छ । यहाँ पुगेपछि बस्नका लागि स्थानिय होटेलको पनि प्रबन्ध गरिएको छ । यो ठाउँलाई पर्यटकीय रुपमा विकास तथा विस्तार गरेर प्रचार–प्रसार गर्न स्थानीय सरकारले विभिन्न पहलहरु अघि बढाएको पुथाउत्तरगंगा–५ का अध्यक्ष टिकासाई घर्तीले बताए । ‘राष्ट्रिय निकृञ्ज अन्तर्गत पर्ने भएकाले यहाँ भौतिक विकास गर्न निकुञ्जको पनि मापदण्डलाई परिपालन गर्नुपर्ने भएकाले चाहे जसरी काम गर्न भने सकेको छैनौं । तर सकेको काम गर्न हामी लागिपरेका छौ । निकुञ्जसंग पनि समन्वय र सहकार्यको प्रयास भइरहेको छ ।’