नेपाल व्यावसायिक बाख्रापालन महासंघका अनुसार दसैंमा उपत्यकाभित्र करिब ६५ हजार खसी–बोका, च्यांग्रा खपत हुने संघको तथ्यांक छ । यसपालि स्वदेशमै पर्याप्त रहेकाले भारतबाट आउने सम्भावना न्यून रहेको महासंघले जनाएको छ । यस पटक रुकुम, रोल्पा, सोलु, बाँके, बर्दियादेखि पूर्वको भोजपुर, इलामलगायत जिल्लाबाट खसी–बोका उपत्यका ल्याइने व्यवसायीको भनाइ छ । विभिन्न जिल्लाबाट ल्याइएका खसी–बोका कलंकी खसी बजार, भृकुटीमण्डप, बालाजु बाइपास, सातदोबाटो, कोटेश्वर, तीनकुने, गौशाला, भक्तपुर, लोकन्थली, सल्लाघारी, चावहिललगायत क्षेत्रबाट बिक्री गरिन्छ । ‘स्वदेशमै उत्पादित लोकल खसी–बोका जति पनि छन्, अभाव हुने सम्भावना छैन । मूल्य पनि बढ्दैन,’ खड्काले भने, ‘गत वर्षको तुलनामा यस पटक बजारभाउ उस्तै छ ।’