यसै सिलसिलामा आइतबार चितवनको इच्छाकामना गाउँपालिका–६ कालिखोलामा संघले आयोजना गरेको कार्यक्रममा चेपाङ समुदायका युवा र प्रौढदेखि यस पर्वका बारेमा चासो र सरोकार राख्नेको जमघट भएको छ । पुजारीको भुमिकामा रहने झाँक्री 'पान्दे' ले ढ्याङ्ग्रो ठटाउँदै र मन्त्र फलाक्दै नयाँ अन्न पितृलाई अर्पण गरेपछि बल्ल घर परिवारका अन्य सदस्यले खाने चलन चेपाङ समुदायमा छ । नयाँ अन्न न्वागी गरेर खाने चलन अन्य समुदायमा पनि चल्दै आएको छ । चेपाङ छोनामलाई नवाङ्गी पनि भन्छन् । चेपाङ भाषामा नवाङ भनेको नयाँ र गी को अर्थ नौलो हुने चेपाङ अगुवा बताउँछन् ।

‘खेतबारीको नयाँ नौलो अन्न घरका अन्यले खानुअघि पितृ र प्रकृतिलाई चढाउने विधि नै छोनाम हो,’ संघका केन्द्रीय महासचिव सन्तबहादुर चेपाङले भने । छोनाम पर्वको अवसरमा बागमती प्रदेश सरकारले आतबार प्रदेशका तीन जिल्ला चितवन, मकवानपुर र धादिङमा सार्वजनिक बिदा दिएको छ । पहाडका भीर पाखामा बस्दै आएका चेपाङहरुले भित्राउने मुख्य बाली भनेको मकै, कागुनो, सामा, पिँडालु नै हो । ‘जुन खेती खानलाई तयार हुने भनेको भदौ याममा हो । त्यसैले हामी भदौ सुरु भएसँगै छोनाम मनाउन सुरु गर्छौं,’ केन्द्रीय अध्यक्ष गोविन्दराम चेपाङले भने ।

भदौ २२ लाई भने संघले विशेष दिन मानेर कार्यक्रम गर्दै आएको उनले बताए । संघले भदौ २२ मा पालो गरेर जिल्लाको एक ठाउँमा केन्द्रीय कार्यक्रम गर्छ । २०६३ सालको भदौमा चितवनको टिकौलीमा नै पहिलो कार्यक्रम भएको थियो ।

यसपालि पटक नारायणगढ-मुग्लिन सडकमा पर्ने कालिखोला पुलदेखि केही पर भएको कार्यक्रममा ढ्याङ्ग्रो बोकेको पान्देहरु छोनामका विधि पूरा गरिरहेका थिए । गीतसंगीतमा युवायुवती रमाइरहेका थिए । पाकाहरु रमाइलो देखेर आनन्द मान्दै थिए । उनीहरू छोनामबारे सुनेजानेका कुरा अरुलाई बताइरहेका पनि थिए । चेपाङहरुले खाँदै आएका गिट्ठा, सिस्नुको साग, कागुनो, सामाको भात र पिँडालुको परिकार पनि कार्यक्रममा आउने पाहुनालाई खुवाएको इच्छाकामना-६ का वडाध्यक्ष लक्ष्मण चेपाङले बताए ।