नागरिक उड्डयन प्राधिकरण मातहतको हवाई यातायात क्षमता अभिवृद्धि आयोजना निर्देशक इन्जिनियर दिपेन्द्र श्रेष्ठका अनुसार विमानस्थलभित्र संचालित तीनवटा फरकफरक आयोजनाको भौतिक प्रगति ६० प्रतिशत हाराहारी सम्पन्न भएको छ । पूर्वाधार विस्तार गर्न गएको हिउँदयाममा त्रिभुवन अन्तर्राष्ट्रिय विमानस्थलमा राति १० देखि बिहान ८ बजेसम्म १० घण्टा बन्द गरेर पूर्वाधार विस्तारका काम गरिएका थिए ।

आन्तरिक र अन्तर्राष्ट्रिय गरी दुवै क्षेत्रका झन्डै १ करोड यात्रुलाई वार्षिक सेवा दिने उद्देश्यले धावनमार्ग जोड्ने ट्याक्सी-वे, अन्तर्राष्ट्रिय एप्रोन, हृयांगर निर्माण लगायतका काम भइरहेको छ । नेपाल सरकार र नागरिक उड्डयन प्राधिकरणको संयुक्त ७ अर्ब हाराहारी लगानीमा अन्तर्राष्ट्रिय एप्रोन र एप्रोनलाई उत्तरतर्फको रन-वेसँग जोड्ने ट्याक्सी-वे निर्माण भइरहेको छ । यो काम सन् २०२० अगस्ट २० बाट सुरु भएको थियो । यो काम ७५ प्रतिशत सकिएको छ । २०२६ फेब्रुअरीमा सकिने छ । यो काम चिनियाँ ठेकेदार कम्पनी एभिक इन्टरनेसनले गरिरहेको छ ।

विमानस्थलभित्रको दोस्रो ठेक्का हो जहाजघर (हृयांगर)का लागि पूर्वाधार निर्माण । विमानस्थलको पूर्वी भागमा नेपाली सेना, नेपाल वायुसेवा निगम, यति एयरलायन्स, श्री एयरलायन्सलगायतका वायुसेवा कम्पनीहरूका लागि करिब ४ अर्ब रुपैयाँमा हृयांगर क्षेत्र निर्माण भइरहेको छ । यो काम ४५ प्रतिशत सकिएको छ । २०२२ नोभेम्बरदेखि सुरु भएको यो काम २०२६ अक्टोबरमा सम्पन्न हुने छ । यसमा एसियाली विकास बैंकको ७८ प्रतिशत ऋण लगानी छ भने बाँकी २२ प्रतिशत रकम नेपाल नागरिक उड्डयन प्राधिकरणको रहेको छ । यो परियोजनामा चिनियाँ कम्पनी एभिक र केडीएन र सीसीईसीसीजेभी रहेका छन् ।

विमानस्थलभित्रको तेस्रो परियोजना धावनमार्गसँग समानान्तर ट्याक्सी–वे निर्माण सञ्चालनको काम ६० प्रतिशत सकिएको छ । सन् २०२२ डिसेम्बरदेखि सुरु भएको यो परियोजनाको समापन २०२६ अक्टोबरमा हुने भनिएको छ । ४ अर्ब रुपैयाँ हाराहारी लगानीको यो परियोजना चिनियाँ कम्पनी गान्सुले निर्माण गरिरहेको छ ।

विमानस्थलको एकमात्र धावनमार्गसँग जोडिएका नजिकैका निर्माणका काम गर्न गएको कात्तिक २३ देखि राति १० देखि बिहान ८ बजेसम्मको समय तोकेर निर्माण थालिएको थियो । यो अवधिमा हुने अन्तर्राष्ट्रिय उडानलाई कटौती गरिएको थियो । हाल काठमाडौं विमानस्थल बिहान ६ बजे खुलेर राति १२ बजेसम्म संचालन हुन्छ ।