धान रोपाइँ भइसक्नुपर्ने फाँट बाँझै छन् । रोपाइँ भएका खेतमा पनि धाँजा फाटेका छन् । इनार सुकेका छन् अनि कलकल बग्ने खोलामा कतै पानीको बुँद देखिन्न ।

बुधबार बसेको मन्त्रिपरिषद्को बैठकले मधेशलाई विपद् संकटग्रस्त क्षेत्र घोषणा गर्ने निर्णय गरेको छ । यसअघि असार २६ गते बसेको मधेश प्रदेश मन्त्रिपरिषद् बैठकले प्रदेशलाई सुक्खाग्रस्त घोषणासमेत गरेको थियो ।

यसपाला साउन ४ सम्म १ लाख ७४ हजार ५ सय ८ हेक्टर अर्थात् ४६.८३ प्रतिशत मात्रै रोपाइँ भएको छ । जबकि गतवर्ष यही अवधिमा यसको दोब्बर रोपाइँ भइसकेको थियो । बढ्दो खडेरीका कारण मधेशमा खानेपानीको चरम अभाव देखिएको छ । खानेपानीको अभाव कम गर्न मधेश प्रदेश सरकार, जिल्ला विपद् व्यवस्थापन समिति, वीरगन्ज महानगरपालिकाको कार्यालय, खानेपानी संस्थान तथा नेपाली सेनाको समन्वयमा ट्यांकर मार्फत महानगरका विभिन्न क्षेत्रमा पानी वितरण भइरहेको छ । प्रदेश सरकारले उपलब्ध गराएका ८ ओटा वारुणयन्त्र र वीरगन्ज महानगरपालिकाको कार्यालयको ट्यांकरबाट पानी वितरण भइरहेको छ । कहीँ कतै भने गैरसरकारी संस्थाहरुले जारको पानी वितरण गरिरहेका छन् । मधेशको देहातमा पनि पानीको जार बोकेर हिँडिरहेको दृश्य देखिन थालेको छ ।

पानीको प्रमुख स्रोत मानिएको चापाकल पनि सुक्न थालेको छ । कतिसम्म भने ६० फिटमा गाडिएको चापाकलबाट सहजै पानी आउने कुरा पनि विगत हुन थालिसक्यो । जनकपुर–२ का ६८ वर्षीय अमरेन्द्र महतोले सुनाए, '४० देखि ६० फिटसम्म गाडिएका चापाकल बिस्तारै ८० फिट हुँदै १ सय २० फिटसम्म गाड्नुपर्ने अवस्था आयो ।'