पछिल्लो तीन दिनयता हेवा खोला खण्डको सडक ठप्प प्रायः छ । जसकारण हेवा खोला पार गरेर आउजाउ गर्नु 'फलामको चिउरा' चपाउनु सरह छ ।

शनिबार मध्यरातमा आएको बाढीले हेवा खोलामा निर्मित डाइभर्सनमा क्षति पुर्‍याएपछि यो खण्डमा यातायात र ढुवानीका साधन चल्न सकेका छैनन् । जसले झापाबाट पाँचथर हुँदै ताप्लेजुङ तथा ताप्लेजुङसहित पाँचथरका हिलिहाङ, याङवरक र फालेलुङबाट सदरमुकाम फिदिम हुँदै विभिन्न स्थानका लागि हिँडेका यात्रुले सास्ती खेप्नु परेको छ ।

ताप्लेजुङतर्फबाट आएका यात्रु भारपा पुछारबाट भिरालो बाटो हिँड्दै झोलुङ्गे पुल तरेर उकालो–ओरालो गर्दै डब्लु गोलाइ आएर सवारीसाधन चढेर गन्तव्यमा जानुपर्छ । फिदिमतर्फबाट ताप्लेजुङ हिँडेका यात्रुले पनि डब्लु गोलाइबाट पैदल मार्ग भएर भारपा पुछार पुगेपछि सवारीसाधन समाउँछन् ।

जंगलभित्रको भिरालो यो गोरेटोबाट वारिबाट पारि र पारिबाट वारि आउन त्यति सजिलो छैन । अझ भारी बोकेर अनि बच्चा बोकेर हिँड्नेका लागि जोखिम पनि उत्तिकै मोल्नु पर्छ । यो बाटो हिँड्ने ज्येष्ठ नागरिक, सुत्केरी, गर्भवती र बिरामीलाई अत्यधिक मर्का पर्छ ।

बेलामौका खोलामा काम गरिरहेको एक्स्काभेटर र फिल्डमा खटेका प्रहरी कर्मचारीले बिरामीलाई खोला तार्न सहयोग गर्छन् । तर जतिबेला पनि यो सेवा जो–सुकैले पाउँदैनन् । स्थानीय भरियाले पुल नभएको मौकामा बढी पारिश्रमिक लिएको गुनासो गरेका छन् ।

‘एउटा घण्टाको बाटोमा १०–१५ किलो बोक्दा पनि हजार–पन्ध्रसय ठटाउँदा रहेछन् । यो त अति नै भयो । मापदण्ड नबनाएकाले हामी यात्रु लुटिनु परेको छ,’ झापाबाट ताप्लेजुङ हिँडेका विजय सार्कीले भने ।

हेवा खोलाको पक्की पुल पहिलो पटक २०८० साल असार २ गतेको बाढीले बगाएको थियो । त्यसपछि २९ दिन लगाएर हालेको बेलिब्रिज पुनः २०८१ असोज १२ गते बाढीसँगै बग्यो । पुनः बनाइँदै गरेको मोडुलर ब्रिज गत जेठ ३१ गते भाँचिएपछि यो खोलामा डाइभर्सनमार्फत सवारी र ढुवानीका साधन वारपार गरिँदैछ ।

पानी नपरेसम्म र बाढी नआएसम्म जेनतेन काम चले पनि ठूलो पानी पर्नासाथ डाइभर्सन पुरिने गरेकाले यस क्षेत्रको यात्रा कष्टकर हुन्छ । अनि यात्रुले सास्ती व्यहोर्नुपर्छ ।