कपिलवस्तुमा बुद्ध जयन्ती मनाउन गठित मूल समारोह समितिले लुम्बिनीबाट शाक्य वंशीय राजदरबार तिलौराकोट पुग्ने प्रवेश द्वार प्राचीन नगर कपिलवस्तुलाई सिंगारेर आकर्षक बनाएको छ । सिंगारिएको बाटो हुँदै शोभायात्राका साथ शिशु बुद्धको प्रतिमा लगिनेछ । मुख्य सडकको विद्युत् प्राधिकरण कार्यालयदेखि गौढी चौकसम्म करिब दुई किमि बाटोमा रहेको बिजुलीको पोल वारिपारि लुङ्दा झुण्ड्याइएको छ । पूरै बजार क्षेत्र बौद्धमय वातावरण बनेर शान्तिप्रति समर्पित बनेको छ ।

रातिको समयमा बल्ने रंगीचंगी बत्तीले सहरमा छुट्टै रौनक थपिएको छ । यसले उक्त बाटो हुँदै आवतवावत गर्ने सर्वसाधारणदेखि शान्तिका अनुयायी मन्त्रमुग्ध भई शान्तिप्रति समर्पित हुने गरेका छन् । नगरलाई शान्ति, सद्भाव र करुणामैत्री बनाउन विभिन्न ठाउँबाट सहयोग लिएर नगरलाई आध्यात्मिक वातावरणमा लगेर फरक काम गरेको बुद्ध जयन्ती मनाउन गठित मूल समारोह समिति संयोजक गोपीकृष्ण शर्माले बताए ।