रामनवमीको अवसरमा नेपाललगायत अमेरिका, चीन, भारत, भुटान, मलेसिया लगायतका तीर्थालु हलेसी आएका छन् । हलेसी तुवाचुङ नगरपालिकाका प्रवक्ता कमल गिरीका अनुसार शनिबार राति करिब पाँच हजार तीर्थालु जाग्राम बसेका छन् । उनीहरू रातभर जाग्राम बसेर बिहान पूजा आराधना गरी आइतबार बिहान फर्किएको गिरीले सुनाए । ‘आज राति करिब पाँच हजार तीर्थालु जाग्राम बसेर बिहान पूजाआराधना गरी बिहान फर्किनु भएको छ,’ गिरीले भने, ‘यातायात र हलेसीमा सुविधा भएपछि तीर्थालुको संख्या पनि बढेको छ ।’

गिरीका अनुसार रामनवमीमा १२ हजार तीर्थालु हलेसी आएका छन् । गत वर्ष छ लाख ८४ हजार सात सय ८५ देशी–विदेशी तीर्थालु, भक्तजन तथा पर्यटक हलेसी आएकोमा यो वर्ष सात लाख बढी हुने अनुमान गरिएको गिरीले सुनाए । त्रिधार्मिकस्थल (हिन्दू, बौद्ध र किरात)को रूपमा हलेसी प्रख्यात मानिन्छ । रामनवमी, शिवरात्री, बालाचतुर्दशीमा भव्य मेला लाग्ने गरेको छ ।