टेन्ट र पन्डाल लगाएर बसिरहेका परिक्रमाकर्मीहरु शुक्रबार बिहान जनकपुरको अन्तरगृह परिक्रमा गर्नेछन् । अन्तरगृह परिक्रमासँगै १५ दिने १ सय २० किलोमिटर लामो धार्मिक परिक्रमा सकिनेछ ।

अन्तरगृह परिक्रमा गरेको भोलिपल्ट अर्थात् शनिबार मात्र जनकपुरमा होली पर्व मनाइनेछ । धार्मिक विश्वासअनुसार अन्तरगृह परिक्रमा सकेको अर्को दिन मात्रै जनकपुरमा होली मनाउने परम्परा छ । अन्तरगृह परिक्रमामा भने जनकपुरवासीको पनि उत्साहजनक सहभागिता रहन्छ ।

दुःख–कष्टबाट मुक्ति र इच्छाएको फल प्राप्त हुने विश्वाससहित परिक्रममा सहभागिता जनाउने गरिएको छ । फागुन औंशीका दिन धनुषाको मिथिलाबिहारी नगरपालिका–८ स्थित मिथिलाबिहारी मन्दिरबाट मिथिला बिहारीको डोलासहित परिक्रमा प्रारम्भ हुन्छ ।

१५ दिने परिक्रमामा जनकपुरको हनुमाननगर, विहारको कलनास्थित कल्यानेश्वर, भारतकै फुलहरस्थित गिरिजा स्थान, महोत्तरीको मठिहानी, जलेश्वर, मडै, धुव्रकुण्ड, कञ्चनवन, पर्वता, धनुषाधाम, सतोखर, औरही, हुँदै परिक्रमा फेरि भारत प्रवेश गर्छन् । भारतको कलना, विसौल गएर परिक्रमा फेरि जनकपुर प्रवेश गर्छ ।