‘महादेवस्थान परिसरमा सामदुायिक भवन बनाउने क्रममा त्यहाँकै स्थानीयमार्फत ढुंगेधारा थियो भन्ने कुरा आइसकेपछि हामी हेर्न गयौं । अभिलेख हेर्दा ढुंगेधारा भएको पायौं,’ उनले भनिन्, ‘त्यो ढुंगेधारा उत्खनन गर्न पुरातत्व विभागसँग स्विकृतिका लागि पेस गरेका थियौं । विभागकै अनुमतिमा काम गरिरहेका छौं ।’ ‘ढुंगेधारा हिटी र पोखरी संरक्षण’ स्वर्णिम योजना र ‘सबैको चाहना ढुंगेधारा हिटी र पोखरीको पुनःस्थापना’ गौरवको योनजाअन्तर्गत महानगरले उक्त काम बढाइरहेको छ ।

महानगरले २०३६ सालमा तयार पारेको अभिलेखअनुसार यो ढुंगेधाराकाे निर्माण १८औं शताब्दीमा भएको हो । अभिलेख तयार पार्दा नै उक्त धारामा पानी आउन छाडेको थियो । सोही अभिलेखमा २०३६ सालमै उत्खनन गर्न भनेर उल्लेख गरिएको महानगरले जनाएको छ । ढुंगेधाराको लम्बाइ २२ फिट र चौडाइ २० फिटको छ । ढुंगेधारामा पानी नआएपछि त्यसलाई पुरेर ट्रस्ट संरचना बनाइएको थियो । ट्रस्ट हटाएर भवन बनाउने याेजना बन्न थालेपछि महानगरले उत्खनन प्रक्रिया अगाडि बढाएको हो ।

उत्खनन स्वीकृतिका लागि पुरातत्वविद्/विशेषज्ञ माग गर्दै महानगरले गत पुस १२ मा पुरातत्व विभागलाई पत्र पठाएको थियो । जवाफमा विभागले पुस २१ गतेदेखि उत्खनन्का लागि अनुमति दिएको थियो । उत्खननमा वरिष्ठ पुरातत्वविद्को नेतृत्वमा ४ सदस्यीय टोली सक्रिय छ । विभागले पठाएको टोलीको रोहबरमा महानगरले उत्खनन कार्य गरिरहेको हो ।