हामी तालमा पुग्दा एउटा मगर गोही ताल किनारमा देखियो । नेपालमा घडियाल र मगर गरी दुई प्रजातिका गोही छन् । मगर गोहीको थुतुनो छोटो र फराकिलो हुन्छ । यसले माछाका अतिरिक्त अन्य स-साना जीवलाई आहारा बनाउँछ । राष्ट्रिय निकुञ्ज तथा वन्यजन्तु संरक्षण ऐनले संरक्षित जीवमा सूचीकृत गरेको मगर गोहीलाई दुर्लभ वन्यजन्तु तथा वनस्पतिको व्यापार महासन्धि (साइटिस) को अनुसूची १ मा राखिएको छ । यसमा सूचीकृत जीवको ओसारपसारमा समेत सम्बन्धित देशका आधिकारिक प्रशासन र वैज्ञानिक निकायको अनुमति चाहिन्छ ।