अहिले बलम्बु क्षेत्रस्थित किसिपिडीमा फ्लाइओभर निर्माणको काम ९५ प्रतिशत सकिसकेको छ । सुरुङभित्र सवारीसाधन गुड्ने क्रंक्रिट ढलानको काम धमाधम भइरहेको छ । फायर फाइटिङ, लाइटिङ जडानको काम भइरहेको छ भने भेन्टिलेसन राख्ने काम जारी छ । पटक–पटक काम रोकिँदा तोकिएकै समयमा आयोजना सम्पन्न गर्न गाह्रो भएको सडक विभागको भनाइ छ । सुरु सम्झौताअनुसार आयोजनाको समयावधि २०८० वैशाखसम्म थियो । उक्त समयभित्र काम नसकिएपछि २०८१ वैशाख १३ सम्म म्याद थपियो, तर काम सकिएन । उक्त समयभित्र पनि काम नसकिँदा २०८२ असोजसम्म म्याद थपिएको छ ।

बलम्बुको किसिपिडीमादेखि सुरुङमार्ग प्रवेश गर्ने मुख टुटीपाखासम्म सडकको दूरी २.३०७ किमि छ । दुई लेनमा सडक कालोपत्रको काम सकिने चरणमा छ । अहिले तेस्रो तहको कालोपत्र गरिंदै छ । ०८० साउन २२ मा आपतकालीन सुरुङको ‘ब्रेक थ्रु’ भएको थियो । यसको दूरी २ दशमलव ५५ किलोमिटर छ ।

मुख्य सुरुङको दूरी २ दशमलव ६८ किलोमिटर छ भने यसको ‘ब्रेक थ्रु’ २०८१ वैशाख ३ मा भएको हो । आयोजना सुरु भएयता तीनवटा अन्डरपास, चारवटा बक्स कल्भर्ट, एउटा ओभरपास, तीनवटा पुल निर्माण भएका छन् । अहिले धादिङतर्फ सुरुङको मुखअगाडि रहेको अप्ठ्यारो पहाड सुधारको काम पनि भइरहेको छ । त्यस्तै यो खण्डमा सुरुङअगाडि सडक सुधारको काम पनि भइरहेको छ ।

सुरुङमार्ग निर्माणको काम जापानी कम्पनी हाज्मा एन्डो कर्पोरेसनले गरिरहेको छ । सुरुङमार्गको कुल ठेक्का रकम २२ अर्ब रुपैयाँ छ । यो आयोजनामा जापानको साढे १६ अर्ब रुपैयाँ सहुलियतपूर्ण ऋण छ । यसमा नेपाल सरकारको ६ अर्ब रुपैयाँ लगानी छ ।