महानगरीय ट्राफिक प्रहरी महाशाखाका अनुसार अन्य दिनको भन्दा बिहीबार उपत्यकाबाट घर जाने यात्रुको संख्यामा एक्कासी वृद्धि भएको हो । उपत्यकाबाट बाहिरिने मुख्य नाका कलंकी ,जगाती, दक्षिणकाली हुँदै बाहिरिने सवारी साधनको संख्या बढ्न थालेको छ ।

बिहीबार गंगबुस्थित नयाँ बसपार्कमा सुरक्षार्थ खटिएका एक सुरक्षाकर्मीले यस्तो भीड दसैंमा मात्र हुने गरेको बताए । उनले भने,'विश्वभर फैलिरहेको कोरोना भाइरसको त्रास र वार्षिक परीक्षा सकिएकाले बिदा मनाउन जाने यात्रुले गर्दा बाहिरिनेको संख्या बढेको हो । '

कोभिड-१९ संक्रमण,रोकथाम तथा नियन्त्रण उच्चस्तरीय समन्वय समितिको बुधबार बसेको बैठकले स्कुल, कलेज, विश्वविद्यालय, सिनेमा हल,सांस्कृतिक केन्द्रहरु, रंगशाला, जिम, हेल्थ क्लब,म्युजियम लगायतका मनोरञ्‍जनस्थल अप्रिल ३० सम्म बन्द गर्ने निर्णय गरेको हो ।