रौतहट — रोपाइँ गर्न मल नभएपछि भारतीय बजारबाट ल्याउन खोज्दा पक्राउ परेका सर्लाहीका दुई किसान दाजुभाइको मुद्दाको सुनुवाइ आउँदो शुक्रबार हुने भएको छ । २७ दिनदेखि न्यायिक हिरासतमा रहेका उनीहरूको धरौटीसम्बन्धी आवेदनमाथि १५ साउनमा भारतीय अदालतमा सुनुवाइ हुने भएको हो । 

धान रोप्ने चटारोका बीच रासायनिक मल नभएपछि भारतीय बजार सोनबर्सा पुगेका बलरा नगरपालिका–५ का सुरेशप्रसाद सिंह र नागेन्द्रप्रसाद सिंह दाजुभाइ १७ असारमा पक्राउ परेका थिए । सोनबर्साबाट २ बोरा युरिया र ६ बोरा डीएपी मल किनेर साइकलमा ल्याउँदै गरेका उनीहरूलाई भारतीय सीमा सुरक्षा बल (एसएसबी) र भारतीय कृषि विभागको संयुक्त टोलीले नियन्त्रणमा लिएको थियो । मल तस्करीको आरोपमा उनीहरूलाई १८ असारमा भारतको बिहारस्थित डुमरा जेल चलान गरेको थियो । दुवैलाई धरौटीमा छुटाउन परिवारका सदस्यहरू निरन्तर डुमरा अदालत धाइरहेका छन् । 

सुरेशका छोरा अविनाश सिंहले बुवा र काकालाई रिहा गर्न माग गर्दै गत शुक्रबार अदालतमा निवेदन दर्ता गराइसकेको बताए । अदालतले उक्त निवेदनमाथि प्रारम्भिक प्रक्रिया अगाडि बढाउँदै सुनुवाइ तोकेको हो । ‘अब सायद धरौटीमा छुट्नुहुन्छ कि । अदालती प्रक्रियाले ढिला भयो,’ उनले भने ।

मुद्दाको सुनुवाइका लागि डुमराका स्थानीय कानुन व्यवसायी किरण चौधरीलाई जिम्मा दिइएको छ । चौधरीसित सिंह दाजुभाइका आफन्त सोनबर्साका प्रवीन सिंहले समन्वय गरिरहेका छन् । वकिल चौधरीलाई उद्धृत गर्दै प्रवीनले आउँदो शुक्रबार डुमरा अदालतमा बहस हुने बताए । त्यसपछि न्यायालयले दुवैलाई धरौटीमा छाड्ने/नछाड्ने आदेश गर्नेछ ।

मल किन्न गएका किसान दाजुभाइ २० दिनदेखि भारतीय जेलमा

झन्डै ३ बिघा खेतका लागि मलको खोजीमा भौंतारिएका सिंह दाजुभाइ थुनामा परेपछि यता परिवारले अहिलेसम्म पनि मल पाउन सकेको छैन । छिमेकीको सहयोगमा रोपाइँ भने गरिएको छ । अविनाशले मलका लागि बलरा–५ को वडा कार्यालयमा निवेदनसमेत दिएको बताए ।