काठमाडौँ — निर्माण थालेको ८० महिनापछि नागढुंगा–सिस्ने खोला सुरुङमार्ग अबचाहिँ सञ्चालनमा आउने भएको छ ।

सोमबारदेखि सञ्चालन हुने सुरुङ चौबीसै घण्टा खुला हुनेछ । पहिलो लटमा आपत्‌कालीन सवारीसाधनलाई सुरुङ खुला गरिनेछ । नागढुंगा सुरुङमार्ग निर्माण आयोजनाका निर्देशक सौजन्य नेपालका अनुसार पहिलो दिन सोमबार एम्बुलेन्स, फायर फाइटिङ र सुरक्षाकर्मीको गाडीका लागिमात्रै अनुमति दिइनेछ ।

सुरुङमार्ग प्रयोग गर्ने सवारीसाधनलाई शुल्क पनि तोकिसकिएको छ । पैदलयात्री, दुईपांग्रे, तीनपांग्रे सवारी र नन–मोटोराइज्ड सवारीले सुरुङमार्ग प्रवेश पाउने छैनन् । डिजेल, पेट्रोल, ग्यासलगायत अत्यधिक प्रज्वलनशील पदार्थ र विस्फोटक पदार्थ बोकेका सवारीलाई सुरुङमार्गमा निषेध गरिएको छ ।

सुरुङमार्गमा शुल्क तिर्न मिल्ने गरी आरएफआईडी (रेडियो फ्रिक्वेन्सी आइडेन्टिफिकेसन) प्रविधिमा आधारित स्टिकरका रूपमा एन–ट्यागको व्यवस्था गरिएको छ । अहिलेलाई एक, दुई र पाँच हजार नगदको एन–ट्याग लिने व्यवस्था गरिएको छ । 

यसबारे विस्तृत थाहा पाउन यो समाचार पढ्नुहोस् : नागढुंगा सुरुङमार्ग सोमबारदेखि सञ्चालनमा आउने

तत्कालीन प्रधानमन्त्री केपी शर्मा ओलीले चन्द्रागिरि नगरपालिका–२ स्थित, टुटीपाखामा ४ कात्तिक ०७६ मा शिलान्यास गरेसँगै सुरुङ निर्माण थालिएको थियो ।

• कहिलेदेखि सञ्चालनमा ?

सोमबार (११ साउन २०८३) देखि । निर्माण सुरु भएको करिब ८० महिनापछि सञ्चालनमा आउँदै

• पहिलो दिन कसले प्रयोग गर्न पाउँछन् ?

एम्बुलेन्स, दमकल र सुरक्षा निकायका सवारी

• अन्य सवारी कहिलेदेखि ?

चरणबद्ध रूपमा सबै योग्य सवारीलाई अनुमति दिइने

• कुन सवारीलाई प्रवेश छैन ?

पैदलयात्री, मोटरसाइकल, तीनपांग्रे र नन–मोटोराइज्ड सवारी

• कुन सामान बोकेका सवारी निषेध ?

पेट्रोल, डिजेल, ग्यासलगायत अत्यधिक प्रज्वलनशील तथा विस्फोटक पदार्थ बोकेका सवारी