काठमाडौँ — राष्ट्रपति रामचन्द्र पौडेलले नागरिक आन्दोलनका अगुवा देवेन्द्रराज पाण्डेको निधनमा दुःख व्यक्त गर्दै समवेदना सन्देश पठाएका छन् ।

समवेदना सन्देशमा राष्ट्रपति पौडेलले पाण्डेको साधना मुख्यतः स्वतन्त्रता, अधिकार र नागरिक आन्दोलनमा रहेको उल्लेख गरेका छन् । उनले नेपालमा लोकतन्त्र स्थापना र पुन:स्थापना तथा विभिन्न संघर्ष र आन्दोलनहरूमा नागरिक अगुवाका रूपमा उनले निर्वाह गरेको नेतृत्वदायी भूमिका सदा स्मरणीय रहिरहने बताएका छन् । 

राष्ट्रपति पौडेलले २०३६ सालको जनमत संग्रहभन्दा केही महिनाअघि सरकारको सचिव पदबाट राजीनामा दिएर पाण्डेले नेपालको लोकतान्त्रिक आन्दोलनका नागरिक अगुवाका रूपमा २०४६ सालदेखि २०६२/६३ सालको आन्दोलनमा दिएको नेतृत्वदायी भूमिका आफ्नो मानसपटलमा अझै ताजा रहिरहेको उल्लेख गरेका छन् ।

समवेदना सन्देशमा राष्ट्रपति पौडेलले भनेका छन्,  ‘२०३६ साल यताको करिब साढे ४ दशक अवधिमा उहाँको जुन भूमिका र योगदान रह्यो, त्यसले आफ्नो क्षेत्र र धारबाट राष्ट्र निर्माणमा योगदानकर्ता मानक व्यक्तित्वका रूपमा भावी पुस्ताले स्मरण गरिरहनेछन् भन्ने मलाई लागेको छ । उहाँको निष्ठा, आचरण र नैतिक जीवनले नेपाली समाजलाई सबै आलोकित गरिरहने मैले विश्वास लिएको छु ।’