रौतहट — सरकारसित नौ बुँदे सहमति भएपछि ६ दिनदेखि बाराको निजगढमा रोकिएका मिटरब्याजपीडितहरु घर फर्कने तयारी गरिरहेका छन् । 

न्यायका लागि जनकपुरबाट सुरु भएको मिटरब्याजपीडितहरुको काठमाडाैंसम्मको पैदल मार्च सरकारसितको वार्ताका क्रममा निजगढमा रोकिएको थियो । 

सरकारसित वार्ता गर्न काठमाडौं गएका मिटरब्याजपीडितका अगुवाको टोली शनिबार निजगढ फर्किए पछि पैदलमार्चमा सहभागीहरु पनि घर फर्कन लागेका हुन् । देशभरीबाट निजगढ पुगेका पीडितहरुलाई वार्ता टोलीका प्रतिनिधिहरुले शनिबार सम्बोधन गरिरहेका छन् । 

मिटरब्याजलाई आर्थिक अपराध घोषणा गर्ने सहमति, ९ दिनदेखिको आन्दोलन स्थगित

मिटरब्याजपीडितको तर्फबाट सयोजक अवधेश कुशवाहा, निर्ग नवीन, मनोकुमार पासवान, रिजन रानामगर, लक्ष्मी घिमिरे र किरण परियार सरकारसित वार्ता गर्न राजधानी गएका थिए । शुक्रबार सरकारी वाता टोलीसित सम्झौता भएपछि शनिबार उनीहरु निजगढ फर्किएका हुन् । 

उनीहरुले वार्तामा भएका सहमति र प्रगतिका बारेमा पीडितहरुलाई सम्बोधन गरे । शनिबार दिउँसो खाना खाएर आ–आफ्नो घर लाग्ने मिटरब्याजबिरुद्ध मजदुर किसान आन्दोलनका भोजपुरा ईन्चार्ज शिवशंकर महतोले जानकारी दिए । ‘वार्ता कार्यान्वयन हुन्छ भन्नेमा हामी विश्वस्त छौं । निजगढमा बसिरहेका सबै पीडितहरु खुसी छन्,’ उनले भने,‘वार्ता टोलीमा सहभागी भएकाहरुले सबैलाई के–के कुरा भयो, के सहमति गरे र आगामी दिनमा कसरी जाने भन्ने विषयमा स्पष्ट पारे ।’ 

वार्ता टोलीलाई पीडितहरुले अबिर लगाएर स्वागत गरेका थिए । १० दिनअघि जनकपुरबाट हिँडेको पैदलमार्च निजगढमा आएर रोकिएको थियो । टोलीमा अहिले ५ सय बढी सहभागी छन् । चितवन, नवलपरासीबाटसमेत मिटरब्याजपीडितहरु निजगढ आइपुगेका थिए ।