काठमाडौँ — सार्वजनिक स्थलमा युवतीलाई गोप्य अंग प्रदर्शन गरेको आरोपमा पक्राउ परेका व्यक्तिलाई अनुसन्धानका लागि ५ दिन थुनामा राख्न प्रहरीलाई अनुमति मिलेको छ । गोप्य अंग प्रदर्शन गरेको आरोपमा बैतडी पाटन नगरपालिका घर भई हाल ललितपुर महालक्ष्मी–२ बस्ने ५५ वर्षीय सुरेन्द्र भट्टलाई पक्राउ गरेको जिल्ला प्रहरी परिसर ललितपुरले जनाएको छ । 

प्रहरीका अनुसार इमाडोलस्थित सार्वजनिक स्थलमा ऋतु खनाललाई हिँडिरहेका बेला भट्टले आफ्नो गोप्य अंग देखाएका थिए । उक्त घटनाको भिडियो खनालले गत आइतबार बेलुका सामाजिक सञ्जाल टिकटक, इन्स्टाग्राम र फेसबुकमा अपलोड गरेकी थिइन् । त्यसपछि उक्त भिडियो एकाएक ‘भाइरल’ भएको थियो । भिडियोमा युवती हिँडेका बेलामा सुरेन्द्रले कपडा खोलेर यौन अंग देखाएको बताएकी छन् । यसपछि उनले उक्त व्यक्तिलाई भाग्न लाग्दा समातेर माफी माग्न लगाएकी थिइन् । 

भिडियो भाइरल भएपछि प्रहरी वृत्त सातदोबाटो ललितपुरको टोलीले भट्टराईलाई पक्राउ गरेको हो ।

प्रारम्भिक बयानमा भट्टराईले गल्ती स्वीकार गरेको जिल्ला प्रहरी परिसर ललिपुरका प्रवक्ता गौतम मिश्रले जनाए । ‘पीडितबाट सार्वजनिक ठाउँमा अश्लिलता प्रदर्शन गर्न नहुने भनी मुद्दा दर्ता भएको छ,’ उनले भने, ‘आरोपीलाई ५ दिनका लागि थुनामा राख्न अनुमति मिलेको छ ।’ आरोपीले प्रारम्भिक बयानमा गल्ती स्वीकारेको मिश्रले बताए । साथै, उक्त व्यक्ति शिक्षा अधिकृत रहेको समेत मिश्रले जनाए । सामाजिक सञ्जालमा राखिएको भिडियो हेरेर नै अनुसन्धान गर्दै जाँदा आरोपीलाई पक्राउ गर्न सफल भएको उनले बताए ।

गृहमन्त्रीको ध्यानाकर्षण 

गृहमन्त्री सुधन गुरुङले फेसबुकमार्फत उक्त घटनामा गृह मन्त्रालयको ध्यानाकर्षण भएको जनाएका छन् । उनले आरोपीलाई पक्राउ गरिएको ऋतुको साहसप्रति सम्मान व्यक्त गरेका छन् ।