बझाङ — सँगै बसेर मदिरा सेवन गरेका साथीहरूबीच उत्पन्न विवादले झगडाको रुप लिँदा बझाङमा एक जनाले ज्यान गुमाएका छन् । झगडामा केदारस्युँ गाउँपालिका–६, त्यडीगाउँका ४२ वर्षीय मोहनबहादुर बोहराले ज्यान गुमाएको प्रहरीले जनाएको छ । 

हत्या अभियोगमा प्रहरीले दुई जनालाई नियन्त्रणमा लिए पनि उनीहरूको परिचय खुलाएको छैन । शुक्रबार राति उक्त घटना भए पनि शनिबार मात्रै बोहराको शव गाउँनजिकैको मकै बारीमा भेटिएको थियो । 

‘तीन जनासँगै बसेर मदिरा सेवन गरेपछि घर फर्किँदै गर्दा सामान्य विवाद भएको र एक जनाले ढुंगाले हानेको रहेछ,’ अनुसन्धानमा संलग्न एक प्रहरीले भने, ‘गहिरो चोट लागेर ढलेको देखेपछि दुई जना मिलेर हत्या गरेको र शव व्यवस्थापन गरेको देखिन्छ,’ उनले मृतक र अपराधमा संलग्न एउटै गाउँका भए पनि उनीहरूबीच कुनै पनि रिसइबी नभइ मदिराका कारण मात्रै हत्या भएको अनुसन्धानका क्रममा पत्ता लागेको बताए ।