कर्णाली नदीमा खसेको गाडीमा सवार यात्रुहरूको खोजीमा सशस्त्र प्रहरीको गोताखोर टोली परिचालित भएको छ भने एक जनाको शव फेला परेको छ ।
काठमाडौँ — दैलेखको चामुण्डा बिन्द्रासैनी नगरपालिका-७ सांगेताडास्थित कर्णाली राजमार्गमा गाडी दुर्घटनामा बेपत्ता यात्रु खोज्न सशस्त्र प्रहरी बल(एपीएफ)को गोताखोर परिचालन भएको छ ।
सशस्त्र प्रहरी बल, नेपाल नं. ६ महेश्वरी बाहिनी मुख्यालय सुर्खेतबाट दिउँसो ६ जना गोताखोरसहितको थप टोली परिचालन गरिएको एपीएफका सहप्रवक्ता डीएसपी शैलेन्द्र थापाले जानकारी दिए ।
सुर्खेतबाट कालीकोटतर्फ जाँदै गरेको कर्णाली प्रदेश ०२-००१ ख १०५५ नम्बरको फोर्स गाडी गति अनियन्त्रित भई सडकबाट तल कर्णाली नदीमा खसेको थियो ।
बिहीबार बिहान साढे ११ बजेतिर दुर्घटना भएपछि उद्धारका लागि सशस्त्र प्रहरी बल नेपाल गुल्म दैलेख, माथिल्लो कर्णाली जलविद्युत् आयोजना सुरक्षा बेस र प्रहरी चौकी पाल्तडाबाट उद्धार टोली खटिएको थियो ।
प्रहरी टोलीले भीरमा अड्किएको अवस्थामा एक जनाको शव निकालेको छ । गाडीमा कति यात्रु चढेका थिए भन्ने यकिन जानकारी खुलेको छैन ।
