काभ्रे — काठमाडौं विश्वविद्यालय (केयु)को ३१औं दीक्षान्त समारोह (दोस्रो चरण) असार १९ गते आयोजना हुने भएको छ । समारोहमा विभिन्न संकायका १ हजार ५ सय २७ जना विद्यार्थीलाई उपाधि प्रदान गरिने विश्वविद्यालयले जनाएको छ ।

दीक्षित हुनेमध्ये २१ जना विद्यावारिधि (PhD/DM/MCh), ९३ जना एमफिल तथा अनुसन्धानमूलक स्नातकोत्तर, २७९ जना स्नातकोत्तर, २ जना पीजीडीई र १ हजार १ सय ३२ जना स्नातक तहका विद्यार्थी रहेका छन् । संकायगत रूपमा स्कुल अफ मेडिकल साइन्सेजबाट सबैभन्दा धेरै ५ सय ४ जना विद्यार्थी दीक्षित हुनेछन् । त्यस्तै स्कुल अफ इन्जिनियरिङबाट ३ सय ५५, स्कुल अफ साइन्सबाट २ सय ७, स्कुल अफ आर्ट्सबाट १ सय ६१, स्कुल अफ म्यानेजमेन्टबाट १ सय ४६, स्कुल अफ एजुकेसनबाट १ सय १२ र स्कुल अफ लबाट ४२ जना विद्यार्थीले उपाधि प्राप्त गर्नेछन् ।

दीक्षित हुनेमध्ये ८ सय पुरुष र ७ सय २७ महिला रहेका छन् । साथै अस्ट्रेलिया, बंगलादेश, चीन, भारत, श्रीलंका, बेलायत र अमेरिकाका १ सय ७९ जना विदेशी विद्यार्थी पनि यसपटक दीक्षित हुनेछन् । यो संख्या कुल दीक्षित विद्यार्थीको ११.७२ प्रतिशत रहेको विश्वविद्यालयले जनाएको छ ।

यसपटक विश्वविद्यालयको इतिहासमै पहिलो पटक Bachelor of Technology in Artificial Intelligence अन्तर्गत २६ जना, Doctor Medicinae in Neonatology अन्तर्गत ३ जना तथा Master of Science in Medical Biochemistry and Molecular Biology अन्तर्गत ४ जना विद्यार्थीलाई उपाधि प्रदान गरिनेछ । 

यस चरणको दीक्षान्त सम्पन्न भएसँगै काठमाडौं विश्वविद्यालयबाट हालसम्म स्नातक हुने विद्यार्थी संख्या ५१ हजार ५ सय ६७ पुग्नेछ । तीमध्ये ६ हजार ३९ जना विदेशी विद्यार्थी रहेका छन् ।