राष्ट्रिय विपद् जोखिम न्यूनीकरण तथा व्यवस्थापन प्राधिकरणले भारी वर्षासँगै आकस्मिक बाढी, पहिरो, कटान, गेग्रान बहाव तथा तराई क्षेत्रमा डुबानको जोखिम बढ्न सक्ने भएकाले सतर्क रहन आग्रह गरेको छ । खोला तथा खहरे आसपास यात्रा गर्ने, पहिरोको जोखिम भएका स्थान तथा नदी किनारका बस्तीमा बसोबास गर्ने नागरिकलाई विशेष सावधानी अपनाउन प्राधिकरणले अनुरोध गरेको हो । साथै, डुबानको जोखिममा रहेका बासिन्दालाई सुरक्षित स्थानमा जान र अरूलाई पनि जानकारी गराउन आग्रह गरिएको छ ।

प्राधिकरणले तीनै तहका सरकार, सुरक्षा निकाय तथा स्वयंसेवकलाई उद्धार तथा प्रतिकार्यका लागि तयारी अवस्थामा रहन निर्देशन पनि दिएको छ । जोखिमयुक्त राजमार्ग र सडकमा आवश्यक उपकरण तयारी अवस्थामा राख्न पनि भनिएको छ ।

हाल कोशी, मधेश र बागमती प्रदेशका सम्पुर्ण भू-भाग, गण्डकी प्रदेशको केही भू-भाग र लुम्बिनी प्रदेशको पूर्वी भू-भागको थोरै स्थानमा मनसुनी वायुको प्रभाव छ । अन्य भू-भागमा पश्चिमी वायु र स्थानीय वायुको आंशिक प्रभाव रहेको छ । गण्डकी र लुम्बिनी प्रदेशको बाँकी भू-भाग, कर्णाली र सुदुरपश्चिम प्रदेशका सम्पूर्ण भू-भागमा भोलि बुधबारसम्म मनसुन विस्तार हुने सम्भावना रहेको जल तथा मौसम विज्ञान विभागले जनाएको छ ।