काभ्रे — सामाजिक सञ्जालमा शुक्रबार दिउँसो करिब ३ बजेदेखि एउटा फोटो चर्चामा रह्यो । धुलिखेल अस्पतालमा उपचारका ल्याइएका घाइते बालकले आफ्नो अभिभावक खोजी गरिरहेको फोटो करिब २ घण्टा चर्चामा रह्यो ।

त्यो फोटो केशरी तामाङले पनि देखिन् । फोटो देख्नेबित्तिकै उनी दगुर्दै बहिनीको कोठामा पुगिन् । त्यहाँ उनले न त बहिनीलाई भेटिन् न त बहिनीको छोरा नै ।

केशरी झन्‌झन् आत्तिन थालिन् । वरिपरि सबैलाई बहिनीको बारेमा सोधीखोजी गरिन् । बहिनी भने बिहानै गाउँ (काभ्रेको रोशी) जाने भनेर भक्तपुरस्थित कोठाबाट हिँडेको खबर पाइन् ।

जुन शंका उनले गरेकी थिइन्, धुलिखेल अस्पताल पुगेपछि, त्यो वास्तविकमा नै पाइन् । ती बालक थिए बहिनीका छोरा, जो नमोबुद्धमा भएको बस दुर्घटनामा घाइते भएका थिए ।

शुक्रबार दिउँसो करिब २ बजेतिर बनेपाबाट रोशी गाउँपालिका-६ स्थित सुघुरेतर्फ जाँदै गरेको बा ३ ख ८३९८ नम्बरको बस नमोबुद्ध नगरपालिकाको बुच्चाकोटमा दुर्घटनामा परेको थियो । करिब ३ सय मिटर तल खोँचमा खस्दा ८ जनाको मृत्यु भयो ।

१८ महिनाको छोरा लिएर माइती हिँडेकी केशरीकी बहिनी र छोरा पनि त्यही दुर्घटनामा परे । बालक घाइते अवस्थामा फेला परेपछि करिब २ घण्टासम्म उनको अभिभावकको खोजी भयो ।

२ घण्टापछि बालकले आफन्तलाई त भेट्यो तर उनले आमाको काख भने कहिल्यै नपाउने भए । दुर्घटनामा उनकी आमा सुमी तामाङको घटनास्थलमै निधन भएको थियो । सुमीको पहिचान उनका श्रीमान् निराजन घिसिङले शनिबार बिहानमात्रै गरेका हुन् । सिन्धुलीको घ्याङलेख घर भएकी सुमी भक्तपुरमा बस्दै आएकी थिइन् । अस्पतालमा आफन्तहरूले बालकलाई सम्हाल्दै सान्त्वना दिइरहेका छन् ।