ठाकुरबाबा नगरपालिका–३ मा नक्कली सरकारी कार्यालय खोलेर स्थानीयलाई नियुक्ती दिने, मजदुरीमा लगाएर ठगी गरेको आरोपमा एक दम्पतीलाई प्रहरीले पक्राउ गरेको हो।
बर्दिया — हुँदै नभएकाे सरकारी कार्यालयको नाम राखेर ठगी गरेको आरोपमा बर्दियामा एक दम्पती पक्राउ परेका छन् । ठाकुरबाबा नगरपालिका–३ का २४ वर्षीय घनश्याम न्यौपाने र दाङ लमही नगरपालिका–५ का २३ वर्षीया कृपा चौधरीलाई प्रहरीले पक्राउ गरेको हो । पक्राउ गरेका न्यौपाने र चौधरी श्रीमान् श्रीमती हुन् ।
ठाकुरबाबा नगरपालिका–३ बगनाहा बजारमा ‘प्रगन्ना तथा बड्कापथ सिँचाइ विभाग ठाकुरबाबा नगरपालिका- ३ बर्दिया, टिकापुर, लम्की'को नाममा सरकारी कार्यालय खोलेर ठगी गरेको आरोपमा प्रहरीले उनीहरुलाई पक्राउ गरेको हो ।
उनीहरुले विभिन्न काममा लगाइदिने भन्दै स्थानीयलाई कर्मचारीमा नियुक्ती दिएको र मजदुरीमा लगाएर ज्यालासमेत नदिएको र कार्यालय संचालन गरेको घरधनीलाई घरको तल्ला थप्न लगाई रकम भुक्तानी नदिई ठगी गरेको आरोप छ । उनीहरुले आफैले सरकारी कागज तथा छाप बनाई हस्ताक्षर, नियुक्ती पत्रमा छाप हानेको र रकम निकासा पश्चात भुक्तानी दिने भन्दै रकम समेत लिई ठगी गरेको खुलेको छ ।
आरोपित न्यौपानेले आफु कार्यालयको सातौं तहको अधिकृत (कार्यालय प्रमुख) भएको भन्दै ठगी गरेको घरधनीले प्रहरीमा जाहेरी दिएका थिए । दुवै जनालाई नियन्त्रणमा लिई ठगी तथा लिखत सम्बन्धी कसुर किर्तेमा अनुसन्धान भइरहेको डिएसपी रेशम बोहराले जानकारी दिए ।
