काठमाडौँ — फोटो पत्रकार एवं पर्वतारोही पूर्णिमा श्रेष्ठले साथीभाइले दिएको प्रतिक्रियाले नै आफूलाई हिमाल चढ्ने हौसला मिल्दै आएको बताएकी छन् । 'निर्भीक नारी'को छैटौँ संस्करणमा आयोजित ‘पर्वतारोही–सगरमाथा’ शीर्षकको छलफलमा उनले यस्तो बताएकी हुन् । 

‘सुरुवातमा माउन्टेन क्लाइम्बिङलाई निरन्तरता दिन्छु भन्ने सोचेको थिइन । हिमाल मन परेर नै हिमाल चढेको हो । बच्चादेखिको सपना पनि होइन । परिवारले पनि हिमाल चढ्नुपर्छ भनेर हुर्काएको होइन,’ पूर्णिमाले भनिन्, 'तर हिमाल चढिसकेपछि साथीभाइले दिएको प्रतिक्रियाले पनि फुरङ्ग भएँ । सफलता मिल्दै गएपछि आत्मविश्वास बढ्दै गयो, अनि हिमाल चढ्दै आएँ ।' पुर्णिमाले छलफलअघि कार्यक्रममा फोटो र भिडियो प्रस्तुत गर्दै पर्वतारोहणको यात्रा अनुभव सुनाएकी हुन् । 

हिमाल चढ्दा कतिले सुरुवातका दिनमा पूर्णिमालाई भन्थे,'केही काम नभएर, हिमाल चढ्दो रहेछ । लत लागेछ ।' तर, हिमालहरू चढ्दै जाँदा उनले पाएको ख्याती, ब्रान्डसँगको सहकार्य र हिमालमै सुरु गरेको करिअरपछि भने समाजले उनलाई स्वीकार्न थाल्यो । ‘पहिला त समाजलाई बुझाउन नै गाह्रो थियो । अहिले यसमा निरन्तरता दिइरहँदा, यस क्षेत्रमा महिलाको उपस्थिति कमी रहेको पाए । यहाँ अवसरहरू धेरै छ भन्ने देखेको छु,’ उनले भनिन् ।