पाँचथर — पाँचथरका स्थानीय तहहरूले गत आर्थिक वर्षमा सवारी साधन मर्मत र इन्धनमा मनपरी तरिकाले खर्च गरेको पाइएको छ । महालेखा परीक्षकको कार्यालयले हालै सार्वजनिक गरेको लेखापरीक्षण प्रतिवेदनमा अस्वभाविक, अपत्यारिलो र नियमविपरीत ढंगबाट खर्च भएको औंल्याउँदै बेरुजु उल्लेख गरेको छ ।

प्रतिवेदनमा मिक्लाजुङ गाउँपालिकाले आर्थिक वर्ष २०८१/०८२ मा एउटै मोटरसाइकल मर्मतमा १ लाख ८९ हजार ८ सय ६९ रुपैयाँ खर्च गरेको उल्लेख छ । मिक्लाजुङ गाउँपालिकाको नाममा रहेको यमाहा कम्पनीको एफजेड मे१ब ७०७ नम्बरको मोटरसाइकल मर्मत गर्न गरेको १ लाख ८९ हजार ८६९ रुपैयाँ खर्चलाई महालेखाले अस्वभाविक ठहर्‍याएको हो ।

प्रतिवेदनले उक्त गाउँपालिकाका अन्य ५ वटा मोटर साइकल मर्मत गर्दा प्रतिगोटा १ लाख ५ हजार भन्दा धेरै खर्च गरेको भन्दै त्यसको विधि प्रक्रिया र व्यवहारिकता माथि पनि प्रश्न गरेको छ । प्रतिवेदन अनुसार मिक्लाजुङ गाउँपालिकाले गत आर्थिक वर्ष सवारी साधन मर्मतमा मात्रै ३५ लाख २४ हजार ६९ रुपैयाँ खर्च गरेको देखाएको छ । 

गाउँपालिकासँग २९ वटा मोटरसाइकल, ट्याक्टर तथा अन्य सवारी साधन रहे पनि मर्मतअघि लागत अनुमान तयार नगरिएको र मर्मत खर्चलाई व्यवस्थित गर्ने स्पष्ट कार्यविधि नबनाइएको महालेखाको निष्कर्ष छ।

त्यस्तै मे१ब ४८५ नम्बरको मोटरसाइकल मर्मतमा १ लाख ८४ हजार ८१ रुपैयाँ, मे१ब ७१० नम्बरमा १ लाख ३३ हजार ६८३, मे१ब २२५ नम्बरमा १ लाख ९ हजार ३८४ र मे१ब ४८३ नम्बरको मोटरसाइकलमा १ लाख २ हजार ८७ रुपैयाँ खर्च भएको देखिन्छ । यी पाँच मोटरसाइकलमा मात्रै ७ लाख १९ हजार १०४ रुपैयाँ खर्च भएको छ । प्रतिवेदनले २२ वटा मोटरसाइकलको मर्मतमा १४ लाख ३४ हजार ६३९ रुपैयाँ खर्च भएको उल्लेख गरेको छ । मिक्लाजुङ जस्तै तुम्बेवा गाउँपालिकामा पनि एउटै मोटरसाइकल मर्मतको खर्च एक लाख नाघेको देखाएको छ । 

तुम्बेवाले एक आर्थिक वर्षमा सवारी मर्मत शीर्षकमा २३ लाख ५१ हजार ८१८ खर्च गरेको छ । जसमध्ये प्र१–०१–००१ ब १२५४ नम्बरको मोटरसाइकल मर्मत गर्दा मात्रै १ लाख ७ हजार २५० रुपैयाँ खर्च गरिएको प्रतिवेदनले औंल्याएको छ । यी गाउँपालिकामा सवारी मर्मत जस्तै इन्धन खरिद खर्च उच्च छ । महालेखापरीक्षकको प्रतिवेदन अनुसार तुम्बेवा, मिक्लाजुङ र हिलिहाङ गाउँपालिकाले मात्रै इन्धनमा १ करोड १४ लाख ६६ हजार १४२ रुपैयाँ खर्च गरेका छन् ।