काठमाडौँ — वसन्तकालीन हिमाल आरोहणको सिजन अन्तिम मोडमा पुग्दा निर्मल पुर्जा (निम्सदाइ) ले मकालु हिमालमा नयाँ रेकर्ड बनाएका छन् ।

८,४८५ मिटर अग्लो, विश्वकै पाँचौं अनि खतरनाक मानिने मकालु शिखरमा पुर्जाले बिहीबार आरोहण गरेका हुन् । योसहित उनले सबैभन्दा बढी ५६ औं पटक ८ हजार मिटरमाथिका चुचुरा चुम्ने कीर्तिमान रचेका हुन । 

संसारका १४ वटा सर्वोच्च शिखरमा आफ्नै लयमा आरोहण गर्न सिपालु यी भूतपूर्व ब्रिटिस 'स्पेसल बोट सर्भिस' कमान्डोले यसपटक मकालुमा 'नो-बोतल अक्सिजन' च्यालेन्ज गरेका थिए । कृत्रिम अक्सिजन (बोतल) बिना नै मकालुको चुचुरो टेकेका पुर्जाको यो अक्सिजनबिनाको २८ औं आरोहण हो । विश्व पर्वतारोहणको इतिहासमा यो तथ्यांक पनि अर्को रेकर्ड हो ।

मकालुको आधार शिविरमा ओर्लिँदै गरेका पुर्जाले कान्तिपुरसँग शुक्रबार दिउँसो भने, 'हिजो दिनको ठिक १२ बजे एकजना गेस्टसहित मैले मकालुको सफल आरोहण गरेँ । कतिपय ठाउँमा डोरी नै थिएन । कतिपय ठाउँ हिउँले पुरिएको थियो । टोलीलाई लिड गर्ने काम मेरै काँधमा थियो । यो आरोहणसँगै ८ हजार मिटर माथिका हिमालमा  मेरो ५६ औं र बिना अक्सिजन २८ औं यात्रा पूरा भएको छ । मेरो पुरानो रेकर्डलाई मैले बदलेको छु ।’