कास्कीदेखि मुस्ताङसम्मका सडकमा जाँच गरी बुधबार रातीदेखि बिहीबार बिहानसम्मको अवधिमा यी गाडी सशस्त्र प्रहरीले नियन्त्रणमा लिएको हो ।
काठमाडौँ — नेपाल-चीन सीमा नाका कोरला हुँदै भित्रिएका ७ सय ७५ वटा विद्युतीय सवारी साधन नियन्त्रणमा लिइएको छ ।
कास्कीदेखि मुस्ताङसम्मका सडकमा जाँच गरी बुधबार रातीदेखि बिहीबार बिहानसम्मको अवधिमा यी गाडी सशस्त्र प्रहरीले नियन्त्रणमा लिएको हो ।
बजेटमा विद्युतीय सवारीसाधनमा करको दर हेरफेर भएको सूचना लिक भएको आशंकामा थप छानबिनका लागि सवारी साधन नियन्त्रणमा लिइएको एक सरकारी अधिकारीले बताए ।
भन्सारका कर्मचारी, भन्सार एजेन्ट र व्यापारीको मिलेमतोमा बजेट वक्तव्य अगावै गाडी जाँचपास गरेर छिराइएको सूचनापछि त्यस्ता गाडीको खोजबिनमा सरकारी संयन्त्रलाई परिचालन गरिएको थियो ।
सरकारले आव २०८३/८४ को बजेटमा विद्युतीय सवारीमा करको दर हेरफेर गरेको थियो । त्यसअगावै ठूलो संख्यामा विभिन्न नाकाबाट त्यस्ता सवारीहरु भित्रिएका थिए ।
कोरला नाकाबाट भित्र्याइएका यी गाडी विभिन्न जिल्ला लैजान लागिएको र उक्त सूचनापछि सुरक्षाकर्मीको सहयोगमा नियन्त्रणमा लिइएको गृह मन्त्रालयका एक अधिकारीले जानकारी दिए ।
सशस्त्र प्रहरीको टोलीलाई रातभर कोरला नाकाबाट आउने सडक खण्डमा चेकिङमा खटाइएको र त्यसक्रममा गाडी नियन्त्रणमा लिइएको सशस्त्र प्रहरी प्रधान कार्यालयका एक अधिकृतले पनि पुष्टि गरे ।
बरामद गाडी नम्बर प्लेट नहालिएका हुन् । सबै गाडी भन्सारलाई जिम्मा लगाउने तयारी भइरहेको एक अधिकारीले जानकारी दिए ।
सशस्त्र प्रहरी बल मुक्तिनाथ बाहिनी मुख्यालय गण्डकीका प्रमुख डीआईजी दीपेन्द्र शाहले नियन्त्रणमा लिइएका गाडीबारे छानबिन भइरहेको र त्यसपछि भन्सारलाई जिम्मा लगाइने बताए ।
