सशस्त्र प्रहरी जवानको ब्यारेक भवन नजिकै रहेको कार्यालय छेऊमा आगलागी हुँदा अमेरिकाले सहयोगस्वरुप दिएको केही गाडी जलेका छन् ।
काठमाडौं — सशस्त्र प्रहरी बलको प्रधान कार्यालय, हल्चोकभित्र रहेको सवारी शाखामा आगलागी भएको छ । सवारीसाधन पार्क गरेर राखेको ठाउँमा आगलागी हुँदा कम्तीमा ५ वटा गाडी जलेको सशस्त्र प्रहरी स्रोतले कान्तिपुरलाई बतायो ।
सशस्त्र प्रहरी जवानको ब्यारेक भवन नजिकै रहेको कार्यालय छेऊमा आगलागी हुँदा अमेरिकाले सहयोग स्वरुप दिएको केही गाडीसमेत जलेका छन् । आगलागी सुरु भएको केही समयमै जानकारी भएलगत्तै नियन्त्रणका लागि दमकल हेडक्वार्टरमा पुगेको थियो ।
'समयमै नियन्त्रणमा लिन सकेका कारण धेरै क्षति हुन पाएन, नभए आसपासमै महत्वपूर्ण भवनहरू भएकाले धेरै क्षति हुनसक्थ्यो,' सशस्त्र प्रहरीका एक उच्च अधिकृतले भने ।
आगलागीको कारण खुलेको छैन । एक अधिकृतले भने विद्युत् सर्ट भएको हुनसक्ने प्रारम्भिक सूचना रहेको दाबी गरे ।
