काठमाडौँ — प्रतिनिधिसभा सदस्य तथा राष्ट्रिय स्वतन्त्र पार्टीका सांसद मिङ्मा ग्याबु शेर्पाले प्रतिनिधिसभाको झण्डासहित विश्वको सर्वोच्च शिखर सगरमाथाको सफल आरोहण गरेका छन् ।

उनले बुधबार बिहान ५ : ४० बजे सगरमाथाको चुचुरोमा पुगेर ‘सदनदेखि शिखरसम्म’ अभियान सफलतापूर्वक सम्पन्न भएको जानकारी दिएका हुन् ।

सगरमाथा आरोहणपछि सामाजिक सञ्जालमार्फत उनले लेखेका छन्, ‘सदनदेखि शिखरसम्मको यात्रा ९औँ दिनमा आज बिहान ०५ : ४० बजे सगरमाथा शिखरमा पुगेर सफलतापूर्वक सम्पन्न भएको जानकारी गराउँदछु । यहाँसम्मको यात्रामा सहयोग, शुभकामना र हौसला प्रदान गर्नुहुने सम्पूर्णमा हार्दिक धन्यवाद ।’

उनले यही जेठ ५ गते काठमाडौंबाट सगरमाथा बेस क्याम्प पुगेर अभियान सुरु गरेका थिए । त्यसदिन प्रतिनिधिसभाका सभामुख डीपी अर्यालले प्रतिनिधिसभाको झण्डा हस्तान्तरण गर्दै उनलाई काठमाडौंबाट विदाइ गरेका थिए ।

सगरमाथा आरोहणसँगै उनले बहालवाला प्रतिनिधिसभा सदस्यका रूपमा नयाँ इतिहास बनाएको दाबी पर्यटन क्षेत्रले गरेको छ ।