बुधबार सांसदहरूको प्रश्नको जवाफ दिने क्रममा मन्त्री चौधरीले किसानलाई मलको अभाव हुन नदिन सरकारले हालै भारतसँग ५० हजार मेट्रिक टन मल खरिद गर्ने प्रक्रिया सुरू गरिसकेको जानकारी पनि दिइन् ।
काठमाडौँ — कृषि, वन तथा पर्यावरणमन्त्री गीता चौधरीले किसानलाई मलको अभाव हुन नदिन सरकारको विशेष ध्यानाकर्षण भएको बताएकी छिन् ।
बुधबार सांसदहरूको प्रश्नको जवाफ दिने क्रममा मन्त्री चौधरीले किसानलाई मलको अभाव हुन नदिन सरकारले हालै भारतसँग ५० हजार मेट्रिक टन मल खरिद गर्ने प्रक्रिया सुरू गरिसकेको जानकारी पनि दिइन् ।
मध्यपूर्वमा देखिएको द्वन्द्वका कारण मलको उत्पादन र आपूर्तिमा समस्या आएको उनको भनाइ थियो । 'नेपाल सरकारले लागत सहभागिताको आधारमा अनुदानमा किसानलाई रसायनिक मल उपलब्ध गराउँदै आएको जानकारी गराउन चाहन्छु ।
चालु आर्थिक वर्षमा हालसम्म ५ लाख ५४ हजार ७६२ मेट्रिक टन रासायनिक मल आपूर्ति भइसकेको छ भने ४ लाख ६३ हजार १६० मेट्रिक टन किसानलाई बिक्री गरिसकिएको छ । गोदाममा रहेको र नेपाल भित्रि सकेको गोदाम इन्ट्री हुन बाँकि रहेको हाल एक लाख ४४ हजार ५८५ मेट्रिक टन मत मौजाद रहेको छ,' मन्त्री चौधरीले भनिन् ।
चालु आर्थिक वर्षको असारसम्मको अवधिमा करिब ६ लाख मेट्रिक टन किसानलाई अनुदानमा मल उपलब्ध गराइने मन्त्री चौधरीले भनिन् ।
धान रोपाइँको सिजनमा मलको अभाव नहोस् भनेर मन्त्रालयको विशेष ध्यानाकर्षण भएको पनि उनले बताइन् । मल आपूर्तिको सम्झौता भइसकेका आपूर्तिकर्ताहरूलाई समयमा नै मल आपूर्ति गर्नका लागि मन्त्रालयले ताकेता गरेको पनि मन्त्री चौधरीले बताइन् ।
भारतसँग जीटुजी माध्यमबाट ५० हजार मेट्रिक टन मल खरिद गर्न मन्त्रिपरिषद्बाट सैद्धान्तिक स्वीकृति प्राप्त गरी सोहीअनुसार मलको खरिद प्रक्रिया सुरू गरिएको मन्त्री चौधरीको भनाइ छ ।
