नवलपरासी पूर्व — जेन-जी आन्दोलनका क्रममा गत भदौ २४ गते कास्की कारागारबाट भागेपछि एक कैदीले २ जनाको हत्या गरेको खुलेको छ ।  

आपराधिक पृष्ठभूमि भएका ३१ वर्षीय सञ्जय विकले कारागारबाट भागेलगत्तै असोज १९ र गत चैत २३ गते गरी २ जनाको हत्या गरेको जिल्ला प्रहरी कार्यालय नवलपरासी पूर्वले जानकारी दिएको छ ।  

प्रहरीका अनुसार सञ्जय २०७२ साल असार २९ गते चोरी घटनामा दोषी ठहरिएका थिए । त्यति मात्र होइन, उनले २०८० साल मंसिर ५ गते कास्कीमा हत्या तथा डाँका चोरी कसुरमा जन्मकैद सजाय पाएका थिए । कास्की हत्या घटनापछि बागलुङ गल्कोट-९ का स्थायी बासिन्दा सञ्जय भागेर गैंडाकोट-१० आए । सम्झनाचोकमा श्यामकुमारी श्रेष्ठको घरमा डेरामा बसे ।

कास्की प्रहरीले उनलाई नवलपरासीबाटै पक्राउ गर्‍यो । जेन-जी प्रदर्शनका क्रममा भदौ २४ गते उनी भागे, फेरि गैंडाकोट नै पुगे । २०८२ असोज १९ गते ७९ वर्षीया श्यामकुमारीको घर पुगे । कोठामा आगो लगाई श्यामकुमारीको ज्यानै जानेगरी उनले सुनका ५ तोलाजति गहनासमेत लुटे ।प्रहरीले उक्त घटनाको अनुसन्धान जारी राख्यो तर क्लु भेट्न सकेन । 

हालै मात्र २०८२ चैत २३ गते देवचुली नगरपालिका-१० टाँगीकोटमा ७५ वर्षीय जिउनराम थनेत र ७१ वर्षीया श्रीमती गुलबसिनिया थनेतलाई हतियारले प्रहार गरी सुनका गरगहना लुटपाट भयो । उक्त घटनामा जिउनरामको ज्यान गयो भने गुलबसिनिया भने अहिले पनि उपचारकै क्रममा रहेको जिल्ला प्रहरी कार्यालय नवलपरासी पूर्वका डीएसपी अनिल पण्डितले जानकारी दिए ।

उक्त घटनाको अनुसन्धानमा केन्द्रीय अनुसन्धान ब्युरो(सीआईबी), गण्डकी प्रदेश प्रहरी कार्यालय र जिल्ला प्रहरीको टोली अनुसन्धानमा खटियो । अनुसन्धानका क्रममा पछिल्लो हत्या र असोजको हत्या र लुटपाटमा एउटै व्यक्ति संलग्न रहेको संकेत भेटियो ।