सर्लाही — प्रतिनिधिसभाकी उपसभामुख रुवीकुमारी ठाकुरले दाइजो प्रथाविरुद्धमा आफूले निरन्तर खबरदारी गरिरहने बताएकी छन् । 

सर्लाहीको चन्द्रनगर गाउँपालिका–२ गौचरण बजारमा आइतबार आयोजित ‘बालविवाह एवं दाइजो प्रथा उन्मूलनको लागि बृहत् सभा’ कार्यक्रमलाई सम्बोधन गर्दै उपसभामुख ठाकुरले दाइजो प्रथा अन्त्यका लागि निरन्तर लडिरहने बताएकी हुन् । 

उनले प्रतिनिधिसभाको पहिलो बैठकमै आफूले दाइजो प्रथाको विषय उठाएको स्मरण गरिन् । ठाकुरले उपसभामुखको भूमिकामा रहे पनि प्रतिनिधिसभा बैठकमा निरन्तर आवाज उठाइरहने प्रतिबद्धता व्यक्त गरिन् । उनले दाइजो प्रथा मधेशी समाजका लागि ठूलो रोग रहेको भन्दै यसलाई निर्मूल नपारेसम्म आफू निरन्तर आवाज उठाइरहने बताइन् । दाइजोकै कारण मधेशमा महिलाहरु विभिन्न प्रकारका पीडा तथा हिंसा भोग्नुपरिरहेको उनको भनाइ छ ।