काठमाडौँ — प्रतिनिधिसभाको रिक्त सचिव पदमा सभामुख डीपी अर्यालले प्रकाश अधिकारीको नाम सिफारिस गरेका छन् । प्रतिनिधिसभाका सचिव हर्कराज राईलाई हटाएर सभामुख अर्यालले अधिकारीको नाम सिफारिस गरेका हुन् । 

सभामुख अर्यालले बुधबार बिहान प्रतिनिधिसभा सचिवमा प्रकाश अधिकारीलाई नियुक्त गर्नका लागि लागि राष्ट्रपति रामचन्द्र पौडेलसमक्ष सिफारिस गरेका हुन् । संसद् सचिवालय स्रोतका अनुसार अधिकारीलाई प्रतिनिधिसभा सचिवमा नियुक्तिका लागि गरिएको सिफारिस राष्ट्रपति कार्यालय पुगेको छ । 

सो सिफारिसअनुसार राष्ट्रपतिले प्रतिनिधिसभा सचिव नियुक्त गर्नेछन् । प्रतिनिधिसभाको सचिव संवैधानिक पद हो । संविधानको धारा १०६ को व्यवस्था बमोजिम सभामुखको सिफारिसमा प्रतिनिधिसभाको सचिव राष्ट्रपतिले नियुक्त गर्छन् ।

प्रतिनिधिसभा सचिवमा सिफारिस अधिकारी संखुवासभाको खाँदबारी नगरपालिकाका स्थायी बासिन्दा हुन् । त्रिभुवन विश्वविद्यालयबाट ग्रामीण विकासमा स्नातकोत्तर गरेका उनले दक्षिण कोरियाको एक विश्वविद्यालयबाट अन्तर्राष्ट्रिय व्यापार तथा आर्थिक साझेदारी विषयमा स्नातकोत्तरको अध्ययन गरेका छन् ।