चितवन — सापटी दिएको पैसा साथीले फिर्ता नगरेपछि भएको विवादले चितवनमा एक युवकको हत्या भएको छ ।

वैशाख २२ गते राति चितवन भरतपुर महानगरपालिका-७ बुद्धचोकमा भएको युवकको हत्या आर‍ोपमा प्रहरीले उनैको साथीलाई पक्राउ गरेको छ ।

बुद्धचोकको सम्भव अटो वर्कसपमा काम गर्ने ३० वर्षका आशिष खनालको हत्या आरोपमा चितवन प्रहरीले नवलपरासी (बर्दघाट सुस्ता पूर्व) गैंडाकोट-१७ बस्ने कृष्णबहादुर खड्का र स्याङ्जा जगतभञ्ज्याङ घर भइ पोखरा बस्ने सम्राट गुरूङलाई पक्राउ गरेको हो । उनीहरूलाई प्रहरीले आइतबार पोखराको एक होटलबाट समातेको हो । 

चितवन प्रहरी प्रमुख एसपी गोविन्द पुरीका अनुसार रूपन्देही सैनामैना घरभएका आशिष र कृष्णबहादुर ५/६ वर्षदेखि मिल्ने साथी थिए । सम्भव अटो वर्कशपमा उनीहरू दुवैले तीन दिन जति सँगै काम गरेको एसपी पुरीले बताए । 'तीन महिनाअघि उनीहरू तीन दिन जति सँगै काम गरेका रहेछन् । त्यो बेला आशिषले कृष्णको पैसा लगेको देखिन्छ ।यत्ति नै भन्ने छैन केही हजार रूपैयाँ जति पैसा दिएको भन्ने खुल्न आएको छ,' एसपी पुरीले भने।