काठमाडौं — कांग्रेसका सभापति गगन थापाले असन्तुष्ट पक्षलाई केन्द्रीय कार्यसमितिमा समेट्ने तयारी गरेका छन् । तत्कालीन कार्यवाहक सभापति पूर्णबहादुर खड्का र नेता शेखर कोइरालासँगको संवादपछि उनी मनोनयन प्रक्रियामा अघि बढेका हुन् ।

बुधबार बिहान थापा र उपसभापति विश्वप्रकाश शर्माले खड्कासँग भेट गरेका थिए । त्यसअघि सोमबार थापाले कोइरालासँग पनि छलफल गरेका थिए । भेटवार्ता सकारात्मक बनेपछि विशेष महाधिवेशनमा सहभागी नभएको समूहलाई केन्द्रीय कार्यसमितिमा मनोनयन गर्ने तयारी भएको कांग्रेसका एक पदाधिकारीले बताए ।

२७–३० पुस २०८२ मा सम्पन्न विशेष महाधिवेशनले थापाको नेतृत्वमा १३४ सदस्यीय केन्द्रीय कार्यसमिति चयन गरेको थियो । उक्त महाधिवेशनको विपक्षमा रहेका पूर्वसभापति शेरबहादुर देउवा र कोइराला समूहले निर्वाचन आयोगले दिएको मान्यताविरुद्ध अदालतमा रिट दायर गरेका थिए । तर, सर्वोच्च अदालतले ४ वैशाखमा विशेष महाधिवेशनलाई वैधानिकता दिएपछि पनि एकताबारे मतैक्य हुन सकेको छैन ।

कोइराला समूह एकतामा सकारात्मक देखिए पनि देउवा पक्षका केही नेता अझै छुट्टै अभियानको पक्षमा छन्। उनीहरूले १४ महाधिवेशनबाट निर्वाचित कार्यसमिति र विशेष महाधिवेशनबाट आएको कार्यसमितिबीच मर्ज वा हालको कार्यसमितिलाई १५औँ महाधिवेशनको आयोजक समितिमा रूपान्तरण गर्नुपर्ने सर्त राख्दै आएका छन् ।

विशेषगरी कांग्रेस नेताहरू प्रकाशमान सिंह, कृष्णप्रसाद सिटौला र विमलेन्द्र निधिलगायतका नेता थापाको नेतृत्व स्वीकार्ने विषयमा अझै अनिच्छुक छन् ।

महामन्त्री प्रदीप पौडेलका अनुसार असन्तुष्ट समूहलाई अधिकतम प्रतिनिधित्व दिँदै एकता गराउने प्रयास भइरहेको छ, जसका कारण मनोनयनमा ढिलाइ भएको हो ।

संशोधित विधानअनुसार सभापतिलाई ६१ जना मनोनयन गर्ने अधिकार छ । ८ क्लस्टर र ७ प्रदेशबाट ४८ जना तथा बाँकी ४० वर्षमुनिका युवा, ल्याटरल इन्ट्री र विदेशस्थित जनसम्पर्क समितिबाट प्रतिनिधित्व गराउने व्यवस्था छ।