काठमाडौँ — अमेरिकामा वैदेशिक प्रत्यक्ष लगानी प्रवर्द्धन गर्ने उद्देश्यले वार्षिक रूपमा आयोजना हुँदै आएको प्रतिष्ठित ‘सेलेक्ट यूएसए इन्भेस्टमेन्ट समिट’ मा यसपटक नेपालले सहभागिता जनाएको छ । मे ३ देखि ६ सम्म भएको सम्मेलनमा बिज सर्भ, स्विफ्ट फिन, कोडावतार, ग्रीन टिक र इभेन्ट मो गरी पाँच नेपाली प्रविधि कम्पनी सहभागी छन् । 

अमेरिकी बजार, लगानी र प्रविधिमा साझेदारी बढाउने उद्देश्यसहित नेपालको निजी क्षेत्रले भाग लिएको सहभागीले जनाएका छन् । सम्मेलनमा अमेरिकी सरकारी अधिकारी, लगानीकर्ता तथा आर्थिक विकाससम्बन्धी संस्थासँग छलफल गरिरहेको अमेरिकी चेम्बर अफ कमर्स नेपाल (एमच्याम नेपाल) ले उल्लेख गरेको छ । 

कार्यक्रममा नेपाली समूहले अमेरिकी विदेश मन्त्रालय र वाणिज्य मन्त्रालयका अधिकारीहरूसँग भेटवार्ता गरेको छ । नेपाली दूतावासले आयोजना गरेको कार्यक्रममा अमेरिकी उपसहायक विदेशमन्त्री बेथानी पी. मोरिसनले पछिल्ला उच्चस्तरीय भ्रमणपछि दुई देशबीचको आर्थिक सहकार्यको गति बढेको उल्लेख गरिन् । नेपालमा निजी क्षेत्रको विकास र लगानीमैत्री वातावरण निर्माणमा अमेरिकाको चासो रहेको उनको भनाइ थियो ।