काठमाडौँ — शनिबार थापाथलीस्थित घर भत्किँदा खम्बसिंह बुढाथोकी मजदुरीका सिलसिलामा नवलपरासीमा थिए । फर्केर आउँदा उनको घर पूर्णरूपमा ध्वस्त भइसकेको थियो । लत्ताकपडा र सरसामान सबै भग्नावशेषमा पुरिए । नवलपरासीबाट फर्किएकै रात बासको खोजीमा उनी दशरथ रंगशाला पुगे । त्यहाँ नाम टिपाएपछि उनलाई व्यवस्थापन टोलीसँगै कीर्तिपुर लगियो ।

आफ्नो छुटेको विवरण टिपाउन उनी बुधबार पुनः रंगशाला पुगे । 'शनिबार नागरिकता साथमा नहुँदा नाम टिपाउन पाइएन । आज जाँदा सोमबार आउनू भनेर फर्काइदिए,' खम्बसिंहले कान्तिपुरसँग भने । उनी मात्रै होइन, विवरण टिपाउन पुगेकी गैरीगाउँ बस्तीकी सीता मगर पनि रंगशालाको गेटबाटै रित्तो हात फर्किइन् । 'नागरिकता लिएर गएकी थिएँ तर भित्र छिर्नै दिएनन्, बाहिरबाटै फर्काइदिए,' सीताले गुनासो गरिन् ।

सुकुमवासी बस्तीमा डोजर चलाएर त्यहाँका बासिन्दालाई विस्थापित गरेपछि उपत्यका विकास प्राधिकरणले दशरथ रंगशालामा उनीहरूको विवरण संकलन (स्क्रिनिङ) गर्दै आएको थियो । सम्पर्कमा आएका परिवारलाई अस्थायी सेल्टरमा पठाउने काम भइरहे पनि प्राधिकरणले बुधबारदेखि उक्त प्रक्रिया रोकेको छ ।

विवरण संकलन रोकिए पनि बिहीबार कान्तिपुर टोली रंगशाला पुग्दा विस्थापितका सामान छरिएका थिए । त्यहाँ न उपत्यका विकास प्राधिकरणको डेस्क थियो, न त विस्थापितहरू नै ।