जुम्ला — कर्णाली प्रदेशको मुगु हुँदै उत्तरी नाका नाक्चेलाग्ना जोड्ने सडक १० वर्षमा १८ किलोमिटर मात्र निर्माण भएको छ । २०६२/०६३ देखि सर्भे सुरु भएको यो सडक २०७२/०७३ देखि मात्र निर्माणको काम सुरु भएको थियो । पछिल्लो १० वर्षमा साढे १८ किलोमिटर मात्रै सडक बनेको हो ।

भौगोलिक विकट्ताले गर्दा द्रूत गतिमा निर्माणको काम अघि बढ्न सकेको छैन । गमगढी नाक्चे लाग्ना सडक ९३ किलोमिटर दूरीको छ । यो आर्थिक वर्षको अन्तिमसम्म ६ किलोमिटर सडक बन्ने सडक डिभिजन कार्यालय जुम्लाले जनाएको छ । यो सडकलाई सरकारले प्राथमिकतामा नपारेका पनि काममा ढिलाइ भएको हो । 

कर्णाली प्रदेशको जीवनसँग जोडिएको यो सडक संघीय सरकारको उपेक्षामा परेको कर्णालीबासीको दुखेसो छ । गत आर्थिक वर्षमा २०७८/७९ चार करोड ९३ लाख सडक निर्माणमा खर्च भएको थियो । २०७९/८० मा चार करोड ४० लाख खर्च भएको छ । अहिले गमगढीबाट मुगु कार्मारोङ गाउँपालिका–९ नजिकै रहेको छाइल सुलसुले भिरसम्म साढे १८ किलोमिटर सडक निर्माणको काम पूरा भएको हो ।

अहिले २२० मिटर कडा चट्टान फोड्न ब्लाष्टिङ सुरु भएको छ । कडा चट्टानी माङ्ग्री भिर खन्न कठिन भएकोले नेपाली सेनाको समन्वयमा ब्लाष्टिङ सुरु भएको हो । भौगोलिक अवस्था, जोखिमपूर्ण भीर र सीमित स्रोत–साधनका बीच पनि सडक खन्ने काम भइरहेको छ । चट्टान छिचोल्न ब्लाष्टिङ सुरु गरेसँगै आयोजनाले गति लिने आशा पलाएको सडक डिभिजन कार्यालय जुम्लाले जनाएको छ । 

अहिले संघीय सरकारले १५ करोड रुपैयाँ स्रोत सुनिश्चित गरेको सडक डिभिजन जुम्लाका प्रमुख इन्जिनियर श्रवणकुमार महताराले बताए । उनले भने, ‘हालसम्म साढे १८ किलोमिटर सडक खुलेको छ । चालु आवमा २२० मिटर कडा चट्टान छिचोल्न ब्लाष्टिङ सुरु भएको छ । अब सडक निर्माणको कामले गति लिने देखिएको छ ।’

अब साढे २४ किलोमिटर सडक ट्रयाक खोलेर ग्राभेलसमेत गर्ने लक्ष्य रहेको उनको भनाइ छ । ‘सीमित स्रोत र कठिन भूगोलका कारण सुस्त गतिमा निर्माणको काम अघि बढेको,’ कार्यालय प्रमुख महताराले भने, ‘अब सकेजति तीव्र गतिमा निर्माण गर्ने योजनामा बनाइरहेका छौं ।’