हार्वर्ड र एमआईटीमा दुई दिन चलेको सम्मेलनमा ५० भन्दा बढी वक्ता र करिब ४०० सहभागी थिए ।नेपालबाट ३५ प्रतिनिधि सहभागी थिए । सम्मेलनमा कृत्रिम बुद्धिमत्ता र कामको भविष्य, नयाँ पुस्ताको नेतृत्व, सबल संस्थाहरू तथा डायस्पोरालगायत विषयमा बहस केन्द्रित थियो ।
What you should know
काठमाडौँ — हार्वर्ड र एमआईटीका विद्यार्थीहरूले यस सप्ताहन्त ‘द नेपाल डिस्कोर्स’ को पहिलो संस्करण सफलतापूर्वक सम्पन्न गरेका छन् । यसले पछिल्लो समयकै सबैभन्दा महत्त्वाकांक्षी वैश्विक जमघटमध्ये एकका रूपमा नेपाली विचारक, नीति निर्माता, उद्यमी, शैक्षिक क्षेत्रका व्यक्तित्व तथा डायस्पोरा सरोकारवालाहरूलाई एकै ठाउँमा भेला गराएको थियो ।
हार्वर्ड विश्वविद्यालय र म्यासाचुसेट्स इन्स्टिच्युट अफ टेक्नोलोजी (एमआईटी) मा दुई दिनसम्म सञ्चालन भएको उक्त सम्मेलनमा ५० भन्दा बढी वक्ता र करिब ४०० सहभागी उपस्थित थिए । सम्मेलनमा नेपालबाट आएका ३५ प्रतिनिधि सहभागी थिए । १६ वटा पूर्ण सत्र (प्लेनरी) र प्यानल छलफलमार्फत सहभागीहरूले नेपालको आगामी दशकलाई दिशा दिने चार प्रमुख स्तम्भहरू- कृत्रिम बुद्धिमत्ता र कामको भविष्य, नयाँ पुस्ताको नेतृत्व, सबल संस्थाहरू तथा डायस्पोरा र विश्वभर छरिएका नेपालीको भविष्यमा केन्द्रित रणनीतिक संवाद गरेका थिए ।
अर्थमन्त्री स्वर्णिम वाग्लेले भर्चुअल रूपमा सम्मेलनको उद्घाटन गर्दै ‘द नेपाल डिस्कोर्स’ जस्ता कार्यक्रमहरूले विश्वभर रहेका नेपाली विज्ञतालाई नेपालको दीर्घकालीन विकाससँग जोड्न महत्त्वपूर्ण भूमिका खेल्ने बताएका थिए । सम्मेलनमा सरकार, शिक्षाक्षेत्र, व्यवसाय र विकास क्षेत्रका प्रतिष्ठित व्यक्तित्वहरूको सहभागिता थियो । तीमध्ये फ्युजमेसिन्सका संस्थापक समीर मास्के, एनसेलका प्रमुख कार्यकारी अधिकृत माइकल फोले, ‘टिच फर नेपाल’ की प्रमुख कार्यकारी अधिकृत स्वस्तिका श्रेष्ठ, हार्वर्ड विश्वविद्यालयका प्राध्यापक पिटर ब्लेयर, माल्दिभ्स, नेपाल र श्रीलंकाका लागि विश्व बैंकका निर्देशक डेभिड सिल्सेन, एएपीआई न्यु जर्सीकी आयुक्त विष्णुमाया परियार, प्रतिनिधिसभा सदस्य पुकार बम, सिद्धार्थ बैंकका अध्यक्ष राहुल अग्रवाल तथा किम्बु टेककी सीईओ कर्विका थापा लगायत रहेका थिए ।
कार्यक्रमको महत्त्वबारे अन्त्यमा डा. अरुण जोशीले भने, 'उदीयमान नयाँ पुस्ताका उत्कृष्ट नेताहरूसँग मिलेर, हामी डायस्पोराको बौद्धिक र आर्थिक शक्ति नेपाल विकासका लागि उपयोग गर्न सक्ने विश्वसनीय मञ्च निर्माण गर्न चाहन्छौं ।'
परम्परागत सम्मेलनभन्दा फरक ढंगले डिजाइन गरिएको यस कार्यक्रमका छलफलहरू कृत्रिम बुद्धिमत्ताले सञ्चालित विश्वमा नेपालले कसरी प्रतिस्पर्धात्मक लाभ हासिल गर्न सक्छ भन्नेमा केन्द्रित थिए । साथै संस्थागत विश्वसनीयता सुदृढ गर्ने, नयाँ पुस्ताको नेतृत्व विकास गर्ने तथा डायस्पोरा सञ्जाललाई अझ रणनीतिक रूपमा उपयोग गर्ने विषयमा पनि जोड दिइएको थियो । कार्यक्रम ‘लिडरसिप एकेडेमी नेपाल’ र ‘कान्तिपुर मिडिया ग्रुप’ को सहकार्यमा आयोजना गरिएको थियो, जसले सम्मेलनको रूपरेखा निर्माण र सरोकारवाला संलग्नतामा महत्त्वपूर्ण योगदान दिएका थिए ।
आयोजकका अनुसार, यो सप्ताहन्त भएका छलफलहरूले ‘स्ट्राटेजिक फोरसाइट २०३५’ नामक दीर्घकालीन मार्गचित्र निर्माणमा सहयोग पुर्याउनेछन्, जसको उद्देश्य सम्मेलनबाट आएका विचारहरूलाई व्यवहारमा उतार्ने योजना बनाउनु हो ।
आयोजकहरूले यसलाई नियमित रूपमा आयोजना गर्ने लक्ष्यसहित सुरु गरिएको ‘द नेपाल डिस्कोर्स’ को पहिलो संस्करणले विचार, संस्था र पुस्ताबीचको सेतु निर्माण गर्दै अझ सुदृढ र विश्व प्रतिस्पर्धी नेपाल निर्माण गर्ने साझा प्रतिबद्धतासहित समापन गरेको छ ।
