ट्रेड युनियन अधिकारको रक्षाका लागि जिफन्ट नयाँ र गतिशील आन्दोलनको खाँचो रहेको औंल्याउँदै उनले भने, 'हामी विभिन्न कार्यक्रमहरू अघि बढाउने तयारी गरिरहेको छौं ।' उनले  नवनिर्वाचित सरकार लोकप्रियतावादी तथा दक्षिणपन्थी अवसरवादी भएको आरोपसमेत लगाए । 

उक्त अवसरमा अध्यक्ष श्रेष्ठले 'मे दिवस-२०२६ घोषणापत्र' जारी गरे । घोषणापत्रमा युवापुस्तालाई ट्रेड युनियन आन्दोलनमा आकर्षित गर्न विभिन्न व्यवस्था गर्ने उल्लेख छ । तलब वृद्धिमा मात्रै नअल्झिने बरू डिजिटल रूपान्तरणमार्फत समृद्धिका लागि संघर्ष गर्ने जिफन्टले जनाएको छ । 

त्यसैगरी, ४० वर्ष उमेर समूहका युवा नेतृत्व विकास गराउने र हरेक तहमा महिला सहभागिता सुनिश्चित गर्दै जाने नीति लिएको अध्यक्ष विनोद श्रेष्ठले बताए । उनले यही वैशाख १८ गते 'कामको अधिकार, श्रमको सम्मान, सीपको अभिवृद्धि; प्रविधिसँग प्रगति, श्रमिकसँग समृद्धि !' नाराको साथ नेपाल र प्रवासमा विश्व मजदुर दिवसका कार्यक्रमहरू आयोजना गर्ने जानकारी दिए ।