काठमाडौँ — सशस्त्र प्रहरी बल (एपीएफ) का महानिरीक्षक राजु अर्याल ४ वर्षे पदावधि पूरा गरी १८ वैशाखमा अनिवार्य अवकाशमा जाँदै छन् । वैशाख २०७९ मा महानिरीक्षक बनेका अर्याल अवकाशमा जाने भएपछि सशस्त्र प्रहरीको भावी नेतृत्व चयनमा सरकार जुटेको छ ।

हालसम्म सशस्त्रमा १३ जना महानिरीक्षक बनिसकेका छन् । अब १३ औं महानिरीक्षक को बन्ने भन्ने टुंगो सरकारले लगाउन लागेको हो । सम्भवतः आजको मन्त्रीपरिषद् बैठकबाट नेतृत्वको टुंगो लाग्न सक्छ । आज नियुक्ति नभए अर्को मन्त्रीपरिषद् बैठकको तालिका बिहीबार मात्रै छ ।

शुक्रबार महानिरीक्षक अवकाशमा जाने भएपछि केही दिनअघि नै टुंगो लगाइसक्नुपर्ने दबाबमा सरकार छ । मन्त्रीपरिषद् बैठकले सशस्त्र प्रहरी महानिरीक्षकको टुंगो लगाउने सम्भावना रहेको प्रधानमन्त्री कार्यालय स्रोतको भनाइ छ । भावी नेतृत्वका लागि सशस्त्रमा अतिरिक्त महानिरीक्षक (एआईजी) द्वय नारायणदत्त पौडेल र वंशीराज दाहाल प्रतिस्पर्धामा छन् ।

दुवै प्रतिस्पर्धी २०५४ वैशाखमा प्रहरी निरीक्षकबाट सेवा प्रवेश गरेका अधिकृत हुन् । २०५७ मा सशस्त्र प्रहरी बल गठन भएसँगै उनीहरु सेवा स्थानान्तरण गरी प्रहरीबाट सशस्त्रमा आएका हुन्  त्यसपछि विभिन्न मितिका निर्णयबाट एआईजी बनेकामा पौडेल ६ जेठ २०७९ मा डीआईबीबाट एआइजी बढुवा भएका थिए भने त्यही वर्षको २८ असोजमा दाहाल एआइजीमा बढुवा भएका थिए । यसरी हेर्दा पौडेल दाहालभन्दा करिब ५ महिना सिनियर हुन् भने उनीमाथि २३ र २४ भदौको जेन–जी आन्दोलन दमन गरेको आरोप पनि लागेको छ ।

जेन–जी आन्दोलनको घटनासम्बन्धी जाँचबुझ गर्न पूर्वन्यायाधीश गौरीबहादुर कार्की आयोगले पौडेलमाथि जेन–जी आन्दोलन दमन गरेको आरोपमा विभागीय कारबाही सिफारिस गरेको थियो । यसरी हेर्दा पौडेलमाथि विभागीय कारबाही सिफारिस छ भने दाबेदार अर्का एआईजी दाहाल पौडेलभन्दा ५ महिनापछि एआईजी बढुवा भएका हुन् । यो पृष्ठभूमिमा नेतृत्वमा पुग्न दुवै लबिइङमा लागेका छन् । दुवैमध्ये जो एआईजी नेतृत्वमा गए पनि हालको ३० वर्षे सेवाअवधि कायम रहेमा चैत २०८४ सम्म पदमा रहनेछन् ।