६ वर्षदेखि मुगुका बर्थिङ सेन्टरमा कार्यरत सिनियर अनमि सरिता कुमारी शाहीले ४ सय ६९ महिलाको सुरक्षित सुत्केरी र १ हजार २ सय गर्भवतीको स्वास्थ्य जाँच गरेकी छिन् ।
What you should know
कालीकोट — मुगुको सोरु गाउँपालिका-९ कालै बर्थिङ सेन्टरमा कार्यरत सिनियर अनमि सरिता कुमारी शाहीलाई 'नेशनल सोसल वेलफेयर अवार्ड २०२५' प्रदान गरिएको छ ।
शुक्रबार काठमाडौंको राष्ट्रिय नाचघरमा सिजन मिडियाद्वारा आयोजित समाराेहमा प्रमुख अतिथि कार्यवाहक प्रमुख निर्वाचन आयुक्त रामप्रसाद भण्डारीले अवार्ड हस्तान्तरण गरे । अवार्ड लिन मुगुको कालै गाउँबाट सरिता बिहीबार ताल्च विमानस्थलमा दिनभर कुरे पनि जहाज नआएकाले काठमाडौं जान सकिनन् । उनकाे अवार्ड मुगुका पत्रकार राजबहादुर शाहीले बुझेका छन् ।
अनमि शाहीले मुगुको दुर्गम बस्तीका गर्भवतीलाई सुरक्षित सेवा प्रदान गरेर आमा र नवजात शिशुको जीवन बचाउन योगदान पुर्याए बापत 'नेशनल सोसल वेलफेयर अवार्ड' प्रदान गरिएको आयोजक सिजन मिडियाले बताएको छ । बिभिन्न क्षेत्रबाट समाजमा योगदान पुरयाउने विशिष्ट ब्यक्तिलाई बिगत १७ वर्षदेखि यो अवार्ड प्रदान गर्दै आएको सिजन मिडियाका अध्यक्ष प्रदीपराज वन्तले बताए ।
सिजन मिडियाले आयोजना गर्ने ‘नेशनल सोसल वेलफेयर अवार्ड २०२५’ को छैटौँ संस्करण शुक्रबार काठमाडौंमा सम्पन्न भएको हो। सामाजिक सेवा, शिक्षा, स्वास्थ्य, मानवीय सहायता तथा आपतकालीन उद्धार (महामारी, बाढी, पहिरो र भूकम्पजस्ता प्राकृतिक प्रकोपको बेला) मा अग्रपंक्तिमा रहेर उल्लेखनीय योगदान पुर्याएका व्यक्ति र संस्थालाई कार्यक्रममा सम्मान र अवार्ड प्रदान गरिएकाे हाे। यसपटक पनि बिभिन्न क्षेत्रमा योगदान पुरयाउने १७ जनालाई यो अवार्ड उपलब्ध गराइएको अध्यक्ष वन्तले बताए।
कालीकोटको शुभकालिका-२ भर्ता गाउँमा जन्मिएकी सरिताले मुगुमा विवाह गरेर कर्मथलो बनाएकाे बताइन् । 'समाजका लागि राम्रो काम (सेवा) गरे मूल्यांकन हुने रहेछ । यसले अझै दुर्गमका दिदीबहिनीको सेवामा लाग्ने प्रेरणा दिएको छ,' उनले भनिन् । दुर्गमका गर्भवती र सुत्केरी महिलाको ज्यान बचाउन उनी रातदिन खटिएको समाचार गत वैसाख २ को कान्तिपुरमा प्रकाशित भएको थियो ।
सरिता ६ वर्षदेखि यहाँको बर्थिङ सेन्टरमा गर्भवती तथा सुत्केरी आमा र शिशुको स्याहारमा सक्रिय छिन् ।
उनले ६ वर्षको अवधिमा जिमा, सिप बर्थिङ सेन्टरमा ४ सय ६९ जना महिलालाई सुरक्षित सुत्केरी गराएकी छन् भने १ हजार २ सय गर्भवतीको स्वास्थ्य जाँच गरेकी थिइन् । उनले स्वास्थ्य संस्थामा सेवा लिन नआउने गर्भवती महिला मात्र नभएर बिकट बस्तीमा पुगेर चेतना अभिबृद्धिमा पनि सक्रिय हुँदै आएकी छिन् ।
