काठमाडौँ — सरकारले नदी किनारका अनधिकृत बस्ती हटाएपछि विस्थापित भएका ५५ परिवार व्यवस्थापनका लागि महानगरको सम्पर्कमा आएका छन् । शनिबार महानगरले थापाथली र गैरीगाउँका सुकुमवासी बस्ती भत्काएसँगै घरबारविहीन भएका ती परिवारहरू व्यवस्थापनका लागि दर्ता प्रक्रियामा आएका हुन् ।

काठमाडौं उपत्यका विकास प्राधिकरणकी इन्जिनियर प्रकृति केसीका अनुसार कीर्तिपुरको सुन्दरीघाटस्थित अस्थायी आश्रयस्थल (सेल्टर) का लागि हालसम्म ५५ परिवार दर्ता भएका छन् । जसमध्ये ५० परिवार थापाथली र ५ परिवार गैरीगाउँबाट विस्थापित भएका हुन् । सम्पर्कमा आएकामध्ये करिब २५ परिवारका १३१ जनालाई सुन्दरीघाटको सेल्टरमा स्थानान्तरण गरिसकिएको अधिकारीहरूले जनाएका छन् ।

शनिबार दिउँसो महानगरको टोलीले बागमती किनारको थापाथलीस्थित सुकुमवासी बस्ती पूर्ण रूपमा हटाएको थियो । महानगर प्रहरी बलका प्रमुख विष्णु जोशीले थापाथली क्षेत्रका संरचना भत्काउने काम सम्पन्न भइसकेको जानकारी दिए । ‘संरचना भत्काइसकिएको छ, अहिले त्यहाँबाट सामानहरू सार्ने काम भइरहेको छ,’ उनले भने, ‘थापाथलीसँगै गैरीगाउँ क्षेत्रमा पनि ५० प्रतिशत संरचना हटाइसकेका छौं ।’