व्यवसायीहरूले एकमुष्ट ठूलो रकम तिर्न कठिन भएको जनाउँदै किस्ताबन्दी सुविधा समेत माग गरेर निवेदन परिषद्मा दिएका हुन् ।
काठमाडौं — समाज कल्याण परिषद्ले भाडा नतिरेका भृकुटीमण्डप परिसरका स्टल तथा कार्यालयमा ताला लगाएपछि किस्ताबन्दीमा भाडा तिर्न पाउनुपर्ने व्यवसायीहरूले माग गरेका छन् ।
लामो समयदेखि बक्यौता भाडा नतिरेका कारण परिषद्ले ३० चैतमा २० वटा स्टल तथा कार्यालयमा ताला लगाएको थियो । त्यसपछि सम्बन्धित व्यवसायी तथा संस्थाहरूले किस्ताबन्दीमा भुक्तानी गर्न पाउने व्यवस्था मिलाइदिन भन्दै निवेदन दिएको परिषद्का व्यवस्थापन विभाग प्रमुख खगनाथ रेग्मीले जानकारी दिए ।
ताला लगाएपछि ५४ नम्बर स्टलले पुरै भाडा चुक्ता गरेको छ । अन्य ५ वटा संस्थाले भने आंशिक भाडा बुझाएका छन् । ‘केहीले रकम बुझाउन थालेका छन्, तर बुझाउनेको संख्या धेरै छैन,’ रेग्मीले भने,‘आंशिक भाडा बुझाउनेको हकमा सञ्चालन गर्न दिने कि पूरा तिरेपछि मात्र ताला खोल्ने विषयमा छलफल चलिरहेको छ ।’
उनका अनुसार व्यवसायीहरूले एकमुष्ट ठूलो रकम तिर्न कठिन भएको जनाउँदै किस्ताबन्दी सुविधा समेत माग गरेर निवेदन दिएका हुन् । परिषद्ले भने बक्यौता असुलीलाई प्राथमिकतामा राख्दै आएको छ । यसअघि पनि पटक–पटक ताकेता गर्दा भाडा नउठेपछि बाध्य भएर ताला लगाइएको परिषद्को भनाइ छ । हाल परिषद्ले प्राप्त निवेदनबारे आन्तरिक छलफल गरेर किस्ताबन्दीको व्यवस्था गर्ने/नगर्ने विषयमा औपचारिक निर्णय दिएको छैन ।
![भाडा नतिर्ने भृकुटीमण्डप परिसरका २० स्टल र कार्यालयमा ताला [सूचीसहित]](http://assets-cdn.ekantipur.com/uploads/source/news/kantipur/2026/third-party/mandap-1342026030827-1000x0.jpg)
