प्राधिकरणका कार्यकारी प्रमुख  दिनेश भट्टले बैठकमा प्रतिनिधिहरूले कुरा राखिरहँदा बीचमा गुरुङले सुझावहरू दिएको बताए । ‘यो खासमा समन्वयात्मक बैठक पनि थियो,’ उनले कान्तिपुरसँग भने, ‘उहाँले गाडीमा जीपीएस जोड्नेलगायतका सुझाव दिनुभएको थियो ।’

बैठकबाट निस्किएको करिब एक घन्टापछि गुरुङले सामाजिक सञ्जालमार्फत राजीनामा दिएको सार्वजनिक गरेका थिए । उनले फेसबुकमा लेखेका छन्, ‘मसँग सम्बन्धित विषयमा निष्पक्ष छानबिन होस् र पदमा रहँदा स्वार्थको द्वन्द्व नदेखियोस् र त्यसमा कुनै असर नपरोस् भन्ने उद्देश्यले मैले आजकै मितिदेखि लागू हुने गरी गृहमन्त्री पदबाट राजीनामा दिएको छु ।’

सम्पत्ति शुद्धीकरण अनुसन्धान विभागको छानबिनमा रहेका व्यवसायी दिपक भट्टसँग गुरुङको व्यवसायिक साझेदारी रहेको विवरण सार्वजनिक भएपछि विवादमा मुछिएका थिए ।

तर, गुरुङको सचिवालयले यसअघि भ्रष्टाचारविरुद्ध गृहमन्त्रीले गरिरहेको कदमलाई रोक्न गृहमन्त्रीको विरोध गरिएको बताउँदै आएको थियो । ‘मेरो लागि पदभन्दा ठूलो कुरा नैतिकता हो, र जनविश्वासभन्दा ठूलो शक्ति कुनै हुँदैन,’ गुरुङले भनेका छन्, ‘आज देशमा सुशासन, पारदर्शिता र जवाफदेहिताको माग गर्दै उठिरहेको जेन-जी आन्दोलनले पनि यही सन्देश दिएको छ सार्वजनिक जीवन स्वच्छ हुनुपर्छ, नेतृत्व उत्तरदायी हुनुपर्छ ।’