कालिकोट — नरहरिनाथ–३ की ७ वर्षीया एक बालिका बलात्कृत भएकी छन् । मंगलबार दिउँसो घरमा कोही नभएको मौका पारी १७ वर्षीय किशोरले बलात्कार गरेको प्रहरीले जनाएको छ । 

घरमा कोही नभएको मौका पारेर पाहुना आएका किशोरले बालिका बलात्कार गरेको जिल्ला प्रहरी कार्यालयका सूचना अधिकारी गणेश ज्ञवालीले बताए । उनका अनुसार पीडक र पीडित दुवै दलित समुदायका हुन् । 

‘नयाँ वर्षको दिन बिहानको खाना खाएर बालिकाका बाजेबजै र काकाकाकी खेतबारीमा काम गर्न गएको बेला दिउँसो बालिकामाथि कुकर्म गरेछ,’ सूचना अधिकारी ज्ञवालीले भने, ‘बालिकालाई दिउँसो घरमा कोही नभएको बेला फकाउन मोबाइलमा कार्टुन हेर्न दिएछ । अनि कुकर्म गरेछ ।’ बालिकाका बुवाआमा दुवै भारतमा छन् । बाजेबजैसँग बस्दै आएकी बालिका नरहरिनाथ–४ घर भएका किशोरबाट बलात्कृत भएको प्रहरीमा जाहेरी परेपछि किशोरलाई प्रहरी नियन्त्रणमा लिएको छ ।