बुटवल — प्रहरीले लुम्बिनी प्रदेशसभा सदस्य रेखाकुमारी शर्मालाई पक्राउ गरिएको जानकारी गराएको छ । प्रदेश सभा सचिवालयले सोमबार सूचना प्रकाशित गर्दै शर्मा पक्राउ परेको औपचारिक सूचना जारी गरेको हो । 

प्रदेश सभा सचिवालयले जिल्ला प्रहरी परिसर काठमाडौंको पत्रका आधारमा बालबालिकासम्बन्धी कसुरमा वादी नेपाल सरकार र प्रतिवादी प्रदेश सभा सदस्य शर्मा रहेको उल्लेख गर्दै पक्राउ परेको जनाएको हो । प्रदेश सभा सचिवालयका अनुसार शर्मा २०८२ चैत १५ गते राति ११ बजे पक्राउ परेकी हुन् । पक्राउसम्बन्धी जानकारी प्राप्त भएपछि सभामुखको आदेशानुसार लुम्बिनी प्रदेश सभा नियमावली, २०७९ को नियम २१६ को उपनियम (२) बमोजिम सूचना प्रकाशित गरिएको प्रदेश सभा सचिव दुर्लभकुमार पुन मगरले बताए । 

प्रदेश सभा नियमावली अनुसार उपनियम ३ मा पक्राउ परेपछि सांसदका रुपमा काम गर्न नपाउने र उपनियम ४ मा ३ वर्ष वा सोभन्दा बढी कैद सजाय हुने फौजदारी कसुर वा नैतिक पतन हुने कसुरमा अभियोग पत्र दायर भएमा सभामुखले प्रदेश सभा सदस्यबाट निलम्बन गर्ने व्यवस्था छ । ‘अहिले उपनियम २ र ३ अनुसार पक्राउ परेको जानकारी र सांसदका रुपमा काम गर्न नसक्ने भन्ने सूचना हो,’ उनले भने, ‘अहिले निलम्बन गर्नुपर्ने अवस्था छैन ।’ शर्मा नेकपा एमालेबाट समानुपातिक प्रदेश सभा सदस्यमा निर्वाचित भएकी थिइन् ।