तत्कालीन गृहसचिव गोकर्णमणि दुवाडी, सशस्त्र महानिरीक्षक राजु अर्याल, तत्कालीन राष्ट्रिय अनुसन्धान विभागका प्रमुख हुतराज थापा र काठमाडौंका तत्कालीन सीडीओ छविलाल रिजालविरुद्ध हेलचक्य्राइँअन्तर्गत फौजदारी कसुरमा अनुसन्धान गर्न सिफारिस गरिएको छ ।

शुक्रबार बसेको मन्त्रिपरिषद् बैठकले कार्की आयोगको प्रतिवेदनको सिफारिसमध्ये सुरक्षाकर्मीहरू जोडिएको विषयमा अध्ययन गर्न कार्यदल बनाउने तथा बाँकीका हकमा तुरुन्त कार्यान्वयन गर्ने निर्णय गरेको थियो। त्यसपछि प्रहरीले जरूरी पक्राउपूर्जी दिएर शनिबार बिहान ओली र लेखकलाई पक्राउ गरेको हो। ‘हामीले पक्राउपूर्जी हेर्यौं। ओलीले त्यसमा हस्ताक्षर गर्नुभयो। त्यसपछि प्रहरीले लिएर गए,’ वरिष्ठ अधिवक्ता भट्टराईले भने,‘कार्की आयोगको प्रतिवेदन नै अतिसयोक्तिपूर्ण छ। त्यसका आधारमा सिधै पक्राउ गर्न मिल्दैन।’

ओली र लेखकलाई मेडिकल गराएपछि भद्रकालीको हिरासतकक्षमा राखिने

प्रहरीले ओलीलाई ‘ज्यानसम्बन्धी कसुर लगायत मुद्दाको अनुसन्धानको सिलसिलामा तत्काल प्रक्राउ गर्नुपरेकाले’ भन्दै जरुरी पक्राउ पूर्जी दिएको छ। वरिष्ठ अधिवक्ता भट्टराईले यसको औचित्यमै प्रश्न उठाए । ‘जरूरी पक्राउपुर्जी सम्बन्धित व्यक्ति भागेर जानसक्ने र फेरि पक्राउ पर्न नसक्ने अवस्थामा मात्र दिइन्छ,’ भट्टराईले भने, ‘उहाँहरू कहाँ जानुहुन्थ्यो र ? देशै छाडेर जाने होइन। पहिलेजस्तै स्थानहद तोकेर अनुसन्धान गर्न सकिन्थ्यो। पक्राउ जरूरी थिएन।’